今年提早過生日, 身邊缺少咗波波, 感覺好失落, 三隻豬仔祇剩返達達, 真係好難過; 腦裡面不斷浮起往年生日, 我會餵波波食少少生日蛋糕, 分享祝福！
'每逢佳節倍思親'真係好貼切嘅形容, 雖然我每日都好想念波波, 但一啲特定嘅日子, 好自然會聯想起往年今日嘅種種, 仍然有感觸!
然後翻睇吓自己舊年生日寫嘅blog, 原來一年前我有發出咁嘅內容, 今日睇返那醫生所言, 完全將我嘅心情講中!
"我們後來看舊照片及影片時，才真的了解到他最後一年老得很快；眼睛看不清了，後腿沒力，每次站起來都很痛苦，他還是忍痛用力站起來迎接我們回家；他早就失去年輕的氣勢，早就想離開老舊的身軀，但是他為了我們，一直硬撐著 ”
https://yippompom.blogspot.com/2019/12/blog-post_10.html
不過有一個重點, 我覺得仍要尊重波波, 佢既然立意即使身體上有不適, 都要堅持選擇陪我更耐, 我好多謝波波咁愛我!
上年生日, 我仲有波波陪住我
而我亦無怨無悔貼身照顧, 只可以講我哋都好珍惜我哋相聚嘅時光, 過往一切已結束, 呢段歷程雖然艱苦, 但回想起呢段路, 仍好感恩可以同乖仔結伴同途!
多謝波波14年陪伴, 令我人生有過一段咁美好嘅回憶, 真愛長存, 往後波波嘅精神, 仍會一直陪伴住我行每一段路😚!
 |
| 今年祇剩返一隻豬仔達達陪我過生日 |
今年嘅生日, 多謝達達豬陪我, 佢體重有回升可能胃口好咗, 不過年紀老大都係會反反覆覆, 我都係唔再對佢作咁多評論, 總之no news is good news, 就講咁多; 容許我做一個迷信嘅八婆, 我真係好怕隻豬小器我就講多錯多😝!
阿女嘅生日同我衹差3日, 過去都會出外晚餐一齊慶祝, 不過因為唔敢留低兩隻長期病患嘅老豬仔, 都有好幾年無出去喇, 今年疫情影響更無諗過要外出啦!
阿女話今年不如帶埋達豬去佢屋企一齊慶祝, 今次係第一年我身邊無咗波波, 佢唔想我坐喺同樣嘅位置切蛋糕; 老公話簡單啲去附近酒樓買外賣, 阿女話佢再親手煮兩味為我加餸, 天氣開始乾燥, 燉個靚湯再煲糖水潤潤; 其實我食得幾多吖, 仲要係我減肥時間, 不過都係一個堂堂正正嘅理由一飽口福😋!
好多謝阿女暖心嘅安排, 仲送比我靚靚生日禮物, 老公都記得訂生日蛋糕, 幸福唔係必然, 感恩我有嘅一切, 已太滿足🙏!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
