日子過得好快, 一個月又一個月, 轉眼間波波離開我已經十個月!
呢段期間, 我確定波波係有返過嚟, 即使我唔一定每次都見到佢; 最近, 呢個講法連工人姐姐都同意, 當我問佢係咪有見過波波, 佢搖頭, 但佢指住波波張床仔!
波波嘅帳篷床仔同紅外線氈我一直保留喺原位, 姐姐亦如常將床仔清潔, 好似往常咁刷毛吸塵, 但佢話有時會刷到毛毛出嚟; 明明每日都刷乾淨, 毛毛嘅顏色亦唔係達達.....
我叫佢下次要比我睇!
今日佢又發覺有毛毛喺氈度, 我一睇就見到係波波嘅毛色, 但靈魂回歸會留下具體物証嗎?
曾睇過某動物群組上載過一個video, 佢嘅毛孩離開後某日, 突然喺廳中發現有poo poo, 望住整段webcam 錄到嘅視頻, 真係匪夷所思點解突然多咗呢個異常物體....
唔探究真相亦無從考究, 自我安慰相信乖仔係有返嚟, 感謝波波一直嘅連繫, 但又擔心會躭誤咗乖仔!
 |
| 我信波波知道, 所以佢有返嚟 |
我好掛住波波, 好多時會定落嚟, 去回憶以往抱住佢嘅感覺, 好想重溫呢種感受, 但好遺憾只餘下腦中影像, 臂彎嘅觸感已經消失得好徹底, 懷抱中已經再無波波, 我已經唔可以再抱一抱乖仔😭⋯⋯
今日, 我又做咗一個視頻, 已經無細數自己做咗幾多個呢類視頻, 祇係每個晚上習慣聽歌, 每每聽到歌詞受觸動時, 就好自然想起波波, 然後就自然而然好似開咗個啟動制😌!
無特別在意旋律是否優美, 只係歌詞實在配合我對乖仔嘅想念, 每句歌詞都代表咗我嘅心事, 就憑歌寄意, 好好感受歌詞表達得咁具體!mp4 - 下輩子不一定還能遇見
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
