跨不過的坎

呢個時期我感覺醫生有熱忱

最近有動物義工問我是否會考慮領養動物? 佢從繁殖場救咗隻毛孩, 覺得我嘅條件好適合, 但我根本唔敢諗; 除咗難接受一次又一次毛孩離開嘅痛, 亦難接受香港嘅動物醫療太難搵個好醫生!

 

對波波, 我有難以釋懷嘅遺憾, 係一道跨不過的坎, 我不諱言對嗰個好多人視為神一樣嘅專科醫生有怨恨⋯⋯
當然以前帶波波睇佢都視佢如好醫生, 的確多年前佢好有熱忱, 所以我毫無保留對佢信任; 我相信佢醫好過好多毛孩, 如果我係個幸運兒我都會視佢如神!

 

 

當日波波不停卒眼, 根本就唔係單純敏感, 係眼壓高引致嘅眼仔痛, 但專科話佢係敏感, 祇同我講白內障、手術, 完全對青光眼問題無提及; 點解我唔信任普通科醫生? 明明有過眼壓高, 專科叫停藥就信任, 仲一而再咁睇咗兩次專科醫生, 專科話佢係敏感, 配枝敏感藥膏我就咁放心?

波波眼仔不尋常變大, 我唔察覺係我粗心, 但我有問過醫生啊

我當日真係比鬼揞眼, 竟然忽視佢眼仔變大不停卒眼, 聽咗專科診斷就當佢眼仔痕😭, 我係崇尚名牌盲目信任? 但我有搵專業判斷啊, 到底我究竟睇嘅係乜嘢醫生?
或者, 係自己偏向往好處諗, 當然希望佢祇係敏感, 唔想面對有壞嘅可能, 自己都要負上責任!

記得轉醫生後醫生拎住病歷,  第一句說話係'青光眼喎', 真係晴天霹靂, 點解會同我講係敏感? 我從無聽過提及呢個病因啊....
如果係青光眼, 點解唔需要滴降眼壓藥? 點解祇建議摘除白內障手術? 一直指向呢個方向諗?

如果唔係聽到呢一句, 我會認為波波嘅眼仔係正常咁變差, 基本接受到唔做白內障手術最終係會盲, 但聽到話青光眼我真係好驚嚇, 青光眼會好痛啊!
醫生見我反應咁大, 好快轉移咗話題, 而我當時亦focus喺當下, 專注聽醫生解釋當時病情, 自己都無再諗, 就忽略咗呢個疑問!

 

及後慢慢回想, 再從頭細諗, 兩個專科講嘅每一句說話, 對當日波波斷症有保留.....
如果我唔去睇專科, 唔幫佢用敏感藥而keep住滴普通科醫生降眼壓藥, 會唔會無呢個遺憾?
對波波, 我無愛得不夠嘅遺憾, 愛佢我已經毫無保留傾盡所有,  但對佢嘅眼仔仍糾結在心, 對自己嘅大意有更多悔恨! 

 

不過阿女話我已經及時轉咗醫生, 佢滴藥後亦唔使摘眼球, 到死都無須手術眼仔可以保留, 已經好好; 我都信命, 如果呢個係佢嘅劫, 要佢面對呢個苦, 我都無能力扭轉乾坤, 祇係, 我仍過唔到, 我應該更早察覺免除佢痛苦.....

 

或者, 即使再從新走過當日, 可能都幫唔到波波, 佢最終都可能保唔住視力, 但至少都可以舒緩佢嘅痛啊....

我都好痛恨自己不停糾纏住相同問題, 好似老太婆纏腳布咁又長又臭, 但一諗返起波波當時受嘅痛楚, 我就恍如萬箭穿心😭!

對動物醫療體系完全失去信心, 無咗呢個範疇支持, 我仲點可能再養動物?

除非, 可以保證嗰個係波波再生!

 

 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！