終於, 親手用陶土做好4隻狗狗, 希望有少少似啦, 我無完全跟足相片做, 相片無我腦中嘅形像咁真實, 因為每個唔同階段嘅狗狗, 都有唔同嘅變化, 我就跟隨自己嘅印象好啦!
做呢幾個公仔, 都用咗好多心機, 曾經洩氣想放棄; 做BeBe, 安安樂樂同精精, 都係一樣喺過程中不斷修改, 雖然都唔敢要求完美; 叻叻嘛...唔想從新再做了, 嘗試再執一次, 當然係有困難!
今次將叻叻公仔狠狠咁鑿到入心, 唔知人哋用乜嘢物料包喺中心, 陶土裹外裡面係另一種用料, 好實, 用咗蠻力先去到深層!
 |
| 綠色嘅唔知係乜東東, 輕身但好硬 |
上次唔敢大刀濶斧, 但今次比上次多咗少少信心, 認為可以保留叻叻原本個身體, 再加大動作改善頭部, 主力喺額頭、面頰、耳仔前後位置等, 睇落改動好少, 其實除咗鼻口, 都係連根拔!
終於, 就做成咗叻叻嘅新生, 放埋其他公仔一齊感覺都還算襯😊!
一路做公仔, 免不了回想過去!
想當年, 我根本唔知咩松鼠狗, 對要養嘅品種一舊雲, 原來松松有咁多size, 我竟然越養越細身!
第一隻狗狗, BeBe, 成犬體重5.4kg
印象中嘅bebe唔覺佢size特別大，應該同安安差唔多嘅骨架，不過可能唔識養乜都比佢食，相信係好肥了😆！
當時我仲係極怕狗嘅階段, 開始嘅時候BeBe都係困喺客廳一角, 每日釋放佢都要等老公返嚟; 我從來同佢無互動, 就算放狗食都要阿女對手仔傳遞, 驚嘛...照顧佢變得極唔輕鬆!
 |
| 做埋佢哋嘅專屬玩具, 當年BeBe就係咬呢種牛皮骨, 唉😰！ |
BeBe係4個月大湊返嚟, 我忘記咗幾時開始克服怕狗嘅心理障礙, 亦唔知幾時愛上咗呢個仔, 遺留喺腦中記得嘅係當時去邊都帶住佢, 行草地去公園瞓街都無所謂!
唔識乜嘢係牛蜱, 唔識點去防虱, 想起當年知識真貧乏, BeBe試過惹上跳虱要去寵物美容院浸藥水!
相比起多年之後, 累積更多經驗, 心理壓力同最初真係天壤之別, 越知得多肩負嘅壓力大到難以估計!
BeBe十歲4個月心臟病離開, 痛入心脾唔識點面對, 佢係我哋第一隻狗狗, 陪伴阿女成長嘅伴侶!
第二隻狗狗, 安安, 成犬體重3.4kg.
BeBe離開半年後接安安返嚟, 當時佢未足3個月, 安安同BeBe來自同一間寵物店!
安安腸胃好差, 我記憶中佢經常痾嘔, 細個時差啲養唔大, 寵物店都叫我換過一隻喇; 當然對待生命唔可以咁兒戲, 佢唔係一個毛公仔, 安安多次入院保命, 最終佢都好叻仔, 15歲先返天家!
 |
| 呢個蕃茄係安安第一個玩具, 第一晚就玩到嘔差啲無命, 好有代表性！ |
回顧我8隻狗狗, 安安最乖, 當日為咗搵個伴比佢, 竟然一帶就帶咗3隻返嚟, 但佢無爭寵好懂事, 無脾氣, 最純品係佢!
其實, 我對佢係有虧欠, 所負出嘅愛一定有分薄, 曾經萬千寵愛在一身變咗4隻平分, 更何況.....我對叻叻有偏心😥!
當日為幫安安搵個伴, 上咗breeder家, 就萬劫不復喇....
原本係上去睇隻B, 結果一見叻叻, 攝咗我魂魄!
阿女呢, 就愛上樂樂, 話要帶樂樂返家....
當年我真係未見過咁細嘅成犬, 我哋一見就話唔要B喇, 同breeder商量可否割愛啦!
Breeder話佢打算移民了, 如果想要就要將餘下嘅3隻都要晒...
從來都係養一隻狗狗, BeBe、安安, 要一次過帶走3隻, 挑戰極大; 但我唔可以捨棄叻叻, 阿女又愛上樂樂, 咁唯有將精精都要埋!
當時精精剛難產, 剃短晒毛縮埋一角好醜怪; 從無諗過要成犬, 仲要天價去買(當時無概念價格), 但為咗叻叻同樂樂, 唔想要多隻都無得選擇!
 |
| 帶返來呢3隻狗狗 |
結果, 帶來3隻狗狗!
精精-當時1歲8個月
成犬體重2.5kg(佢size唔大, 但肥, 可能谷佢生B啦)
樂樂-當時9個月1.2kg, 返來幾日就要入院, 斷症嚴重營養失衡, 後來上升至成犬體重2kg, 一直穩定成長喇!
叻叻-當時10個月1.8kg,可能打算出show, 體重一直keep住, 佢最穩定最smart!
再加埋當時11個月3kg嘅安安, 4隻狗狗好熱鬧!
原本, 有諗住送精精比朋友啦, 照顧少一隻都無咁辛苦嘛; 同佢哋去寵物店沖涼講起, 老板亦肯出高價, 話精精樣子唔算甜美但骨架靚啊; 但流落寵物店下場有幾慘? 我會忍心將佢嘅一生推向萬劫不復嗎?
老公話入咗我哋門口就係我哋狗狗, 唔會捨棄唔會賣, 阿女話唔可以要精精淪為生育機器咁無人性啦!
 |
| 記憶中嘅精精從來唔愛玩具 |
最後, 當然精精都係留下, 唔捨得比朋友更唔會賣, 踏咗入我家就係我家狗狗, 直到生命盡頭啦!
精精最終離開係14歲9個月!
叻叻, 同樂樂係一對, 佢哋好似後來嘅豬仔波波達達, 自然分組總係黏埋一齊; 原本係一對開心狗狗, 但叻叻多病, 即使我竭盡所能去照顧佢, 最後都係10歲7個月就離開咗喇!
我對叻叻超疼愛, 永難忘記同佢抗病嘅一段路, 半夜入24急症保命變害命, 失去佢真係傷心咗好耐好耐!
 |
| 叻叻最愛嘅音樂紅蘿蔔 |
然後樂樂, 佢係一隻happy dog, 佢好鍾意個彩虹波波, 追住喪跑毛髮飛揚, 但自從叻叻離開, 佢鬱鬱不歡唔再快樂, 總係藏身喺門後面唔肯出來!
一隻一隻狗狗離開, 從佢身上見到影響最大, 佢最後15歲8個月上天堂!
 |
| 樂樂嘅彩虹球, 最有代表性, 永遠陪伴佢！ |
接波波同達達到家時, 叻叻已經走咗, 安安, 樂樂同精精都仲喺一齊, 曾經係5狗之家嘅大家庭啊; 到豆b跟我時, 精精已離開....
3隻豬仔大家都好熟識喇, 之前嘅5寶今日就借住講陶土公仔又講講!
 |
| 附加3隻豬嘅玩具, 都做咗佢哋嘅最愛! |
每一隻狗狗都係寶, 我一定堅持不離不棄陪伴佢哋終老, 愛鍚佢哋視如珍寶！
無想到做幾個公仔, 影響咗我回顧前半生嘅狗狗, 好懷念我嘅毛寶寶, 好懷念過往!
 |
| 手工當然無師傅咁好, 但都好過無😄! |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
