又到咗September 9月, 波波生於呢個月亦死於呢個月, 我一定唔會忘記呢個月份!
到今日波波已經離開咗一年, 365日長唔算長, 但亦唔算短, 但佢離開我當日嘅情境, 當時嘅每個片段, 仍歷歷在目近在眼前, 我真係好想緊緊捉住佢手仔, 唔想鬆開唔捨得同佢分別😭....
但現實係, 我哋真係分開咗足足一年, 而我對佢仍係每日都好想念!
已經一年了, 我完全無意欲出外, 一來疫情影響, 二來有少少逃避行經同3隻豬仔散步嘅路線!
 |
今日, 係波波忌辰, 我特別想帶佢出去行一轉, 將波波掛飾放喺身邊, 緩解思念!
見到有人推住狗狗車仔我個心好似有雷擊閃電, 更意外地竟然碰到曾經同波波有過互動嘅狗狗, 係上天嘅差遣? 係波波想見佢哋一面?
波波離開後我第一次見到熟識嘅狗狗, 見到當日有傾談過嘅主人, 但今日叫我行過去個打招呼都唔敢, 一見到佢哋已經自然眼眶熱了喉嚨哽咽, 怕一開口眼淚會掉😢!
 |
| 換毛期波波嘅猴子臉, 當時係4個月 |
再想從前, 我信緣!
明明無打算養baby dog, 自己實在再無信心handle一隻BB, 當年我有清楚同Y姐姐表達我想養成犬, 可惜安排見過面嘅都唔投緣; 誰知2006那年冬節, Y姐姐突然call我, 話breeder帶來一隻狗狗, 叫我不防見個面, 正好當時喺附近就即管過去見一見.....
一直以為係另一隻成犬, 仲清楚記得一見呢隻BB喺度彈彈跳, 乜嘢計劃都拋到九霄雲外, 抱住佢唔捨得放手, 乜都無準備, 但完全無猶豫, 就直接將小小嘅佢放入大褸袋裡面!
 |
| 細細個已經好痴纏😍 |
呢十幾年, 有苦有甜, 有哈哈大笑有眼淚漣漣, 有憂心忡忡有幸福無邊, 點點滴滴交織成無數個難忘片段; 而我相信我哋一定有一道隱形嘅bonding連繫, 呢種從來未有過嘅默契我實在懷念, 呢種無保留嘅愛一直喺心裡面蔓延!
愛從來唔可以用任何嘢去測量, 我嘅得著同失落唔係正比, 但其間我長咗智慧, 喺佢身上學懂好多, 歲月嘅落失係無可奈何, 亦無法改變!
 |
| 一轉眼就過咗14年, 最終都要同你分別, 但我知道我哋一定會再見! |
波波, 我諗前世今生, 甚至來生都注定我哋一定會結緣, 我哋相互嘅愛亦會延綿不絕!
你喺天家要過得逍遙, 先好好享受那一片樂土, 耐心等待那一天, 越過彩虹橋同媽媽再相見!
愛和思念, 不熄不滅!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
