今日, 睇返我評論過3隻豬睇過嘅好獸醫, 好似一個一個都不如從前了....
有啲可能因為自立門戶開支大, 收症超額, 導致睇症無比足夠時間, 三言兩語就將你打發!
有啲資歷深咗, 有上岸嘅心態, 唔想嘗試唔想動腦筋唔想揹鑊hea住轉鈦, 動不動就話轉介, 最好係打個防疫針就收錢快!
有啲就壓力大, 大到情緒快失控, 精神難集中, 做唔到用心看診眼神空洞, 已經再難溝通!
有啲就帶你遊花園, 避重就輕掠過你嘅提問, 轉移重心, 帶你游向佢屬意嘅方針, 但又唔詳細解釋去釋除你疑問.....
我感覺我接觸過嘅醫生, 都好似有職業怠倦symptom, 缺乏咗激情同動力, 同曾經嘅佢有好大分別, 已經做唔到無忘初心, 無咗醫者父母心, 失去對待生命嘅熱忱!
大家都知依家超難約到個appointment, 有時因趕急迫住要去睇未曾睇過嘅醫生, 但往往睇完都得個吉, 遇過無能力斷症, 可能咁又可能咁, 問極都講唔到重心, 聽到一舊雲唔知佢講乜 ....
太多太多感受, 真係一言難盡, 總括來講, 最好係醫生話乜就乜, 祇要信不要問, 問多句都黑面話你google上腦使乜睇醫生!
生命無take two, 我嘅狗狗係我命根, 點解我唔可以有提問? 點解我唔可以得到診斷疾病後嘅成因?
我唔係奄尖嘅人, 我非常願意配合醫生, 唔係我為乜去見醫生? 為咗辯論有錢分嗎?
但為寶貝把關係我嘅責任, 選擇醫療方向我都有我嘅方針, 有懷疑、我唔識、唔明白、有擔心, 當然要問; 如果我嘅認知同醫生建議有抵觸, 只要醫生肯講解清楚點解要行呢步, 俗語講你嘅理據講得我服, 我點會唔聽從?
可惜今時今日, 好難搵個咁嘅醫生, 同你解釋嗎? 徙我時間, 我話咁就係咁, 唔同意唔使再來喇!
睇咗太多毛孩醫療個案, 有認識嘅朋友亦有陌生人, 真係一字一淚可以話觸目驚心....
原來唔識睇xray, ultrasoud, CT嘅獸醫佔頗大部份, 我自己親身經歷係拎到去都唔肯望一望, 亦有話影像朦睇唔到(呢個理由聽落還好)!
今日睇到有毛孩家長談及佢嘅經歷, 話拎住專家比嘅報告去見獸醫, 見咗兩個醫生睇同一份報告, 可怕在講解可以完全唔同....
令人對獸醫嘅信心徹底淪陷, 去邊度先可以搵到個獸醫比到人信心!
如果你無呢種煩惱, 你真係超幸運, 如果你曾經此苦, 就一定有同感!
今日網上又睇咗幾個case, 對比自己咁多年來嘅經歷有感而發, 不吐不快; 養咗狗狗幾十年喇, 知得越多經驗越多, 好似越慘, 我感覺依家靠獸醫真係五五波, 再難信任要睇運; 以前胡裡胡塗根本唔識, 衰咗邊方面都唔知就唔會自責, 無咁揪心!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
