3隻豬一直同我哋用同一個廁所, 放尿片入去佢哋都好合作, 唔會通處痾; 雖然初時教豆b真係用咗好耐時間, 但依家總算好安樂, 佢唔會再攪錯; 不過自從新姐姐嚟咗, 又衍生出新嘅問題, 事關姐姐每次用洗手間都頗耐, 對twins係唔會忍住尿尿唔去痾!
近來真係頭都大埋, 對twins成日作怪, 初時係見到廁所門關咗, 佢哋就喺門口照痾, 波波會舉腳射向廁所門, 豆b仲好似漸漸習慣晒, 無論扇門有無關上, 佢都一樣喺門口屙, 唔再入廁所 :(
咁辛苦教到佢去廁所尿尿, 依家功虧一匱, 要認真諗過!
雖然呢個問題以前都有發生過, 但間中同常常就差別好大, 唔可以叫姐姐唔好用廁所, 連叫佢唔好每次用咁耐都好難開口, 祇同佢間接講過; 我話D豬仔唔會理咁多, 見你關門咁耐就照痾, 佢哋係唔會忍咁耐, 不過我諗佢都應該唔明我真正嘅意思囉 :(
唉, D姐姐鍾意拎個手機入去講、講、講, 我點會聽唔到喎, 除非當佢自言自語鬼上身囉!
問題始終要解決, 可惜依家間屋只有一個廁所, 真係無以前咁方便囉!
無意中喺FB見到有隻松松用L型狗狗廁所, 我諗依家我都有需要喎!
呢種廁所我以前都見過, 但從來無諗過我都要用, 咁鬼大個好阻地方; 但波波又唔可以用細個, 佢便便要轉、轉、轉, 太細佢轉唔到咪又會通處痾, 要考慮清楚 !
日復日咁亂咁痾, 如果成為習慣就死火, 咁多年調教好守規矩嘅波波, 再唔諗辦法前功盡廢喎, 阻地方都無可奈何, 決定買番個!
買咗個狗狗廁所已經有3日, 一放好已經即刻教波波; 原來我鍚呢個仔真係有原因, 佢真係好聰命喎!
當然我先放好有尿尿嘅片片, 等有個記認呢處以後就係佢嘅廁所, 然後抱佢上去叫佢尿尿, 佢轉咗兩轉即刻舉腳痾 :)
我keep住定時抱佢上去叫佢痾, 兩、三次後佢已經記得囉:)
豆b....見到波波痾佢又去痾, 開心死我!
點知呢個傻大姐叻咗一次咁多, 之後就望住個廁所, 然後痾落張yaga mat, 激死我!!!
之前以為用yaga mat打理容易, 濕咗一抹就OK, 點知諗錯; 佢哋一痾濕咗會直滲入底, 抹極都濕仲衰過用布質, 要即刻成張拎去洗囉, 都係鋪地墊好過; 拼接嘅地墊可以邊度濕咗即起出嚟拎去清洗, 細細塊易洗又快乾, 乾淨簡單又衛生, 好用好多!
唯有再買, 鋪埋走廊, 咁達達唔使壓力咁大, 行到嗰度要停一停諗一諗咁慘囉!
每日反反覆覆咁教豆b, 又再實行friendly training, 一痾中地方即有獎賞, 不過呢個傻妹時好時壞, 要佢記得呢個係佢哋嘅廁所, 都要一段時間囉!
至於達達豬, 我都嘗試教過, 不過一抱佢上去佢嚇到成個跳起, 咁大反應比佢嚇死我, 算喇由得佢照舊喺圍欄裡面嘅片片痾啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
