 |
| 相片連結 |
病咗一段長時間, 唔係咩大病, 只係一個感冒, 但碰上唔適當時間, 倍感麻煩; 無咗工人, 自己病已經攞命, 仲要慘到同老公齊齊高燒39.2度, 兩個人暈吓暈吓, 變咗廢人一樣啦!
記憶中已經好耐無發燒喇, 對一個成年人來講, 小毛病會常有, 但發高燒都屬少數啦; 好似從來未試過咁辛苦, 渾身骨痛, 頭痛加上喉嚨痛, 每呼吸一吓都被疼痛侵襲, 好慘!
身體健康真係唔到你逞強, 一般日常輕而易舉嘅家務, 頓時變為千斤重擔, 自己唔食都要照顧好3隻豬嘅3餐, 喺病到頭重脚輕, 個人虛虛浮浮, 爬起身為佢哋張羅每一餐, 都要耗盡全力, 怪唔得有話病來如山倒, 病去如抽絲, 一病就將我打沉晒, 要好番又咁難 :(
不過喺咁軟弱嘅時刻, 問我有無後悔炒咗個姐姐, 我可以肯定咁答, 係"無"啦!
但呢一場小病令我認清方向, 鐘點姨姨係無可能取代家傭啦, 雖然鐘點姨姨做清潔真係一流, 但當我最需要有人扶我一把, 佢都係幫唔到我手嘛!
好討厭但無奈又要往個困局羅網自投, 又要再向外傭招手, 事實對外傭已經失望透, 但當患病期中人係咁軟弱, 最簡單要去煲一壺滾水, 就已經可以耗盡你體能嘅極限!
算喇但求唔好請到個頂心杉就唔計較喇, 質素係咁無謂作虛假嘅幻想啦!
仲有不足兩星期就係3隻寶貝嘅9歲生日, 從未有過好似今次咁麻煩, 一切都不在掌握, 炒咗個工人亦唔係既定嘅計劃, 剩番自己一雙手仲要病到得半條人命, 唔強求喇; 往年一早張羅好食物靚衫, 要做佈景攪大project嘛, 今年病到老公都忘記攞假, 唉!
還好一個月前預訂咗生日蛋糕, 總算有個birthday cake啦, 今年就將一切簡化!
望見3隻豬成隻乞兒仔咁喇, 病咗無同佢哋梳理好, D毛毛亂七八糟啦; 無奈個人都仲係虛虛浮浮, 做唔到就係做唔到, 學習妥協罷!
算喇無謂比自己壓力咁大, 反正做個形式都係自娛, 比自己開心吓, 3隻豬只要有喜歡嘅食物, 唔使將佢哋舞來舞去, 佢哋更開心啦!
9歲喇, 時間過得飛快, 轉眼3隻豬都已經走過一生最多姿彩, 最有活力嘅日子喇, 一如過往自己嘅習慣, 為狗狗攪生日會只會做到十歲, 就如一般老人家, 大壽之後生日都低調進行喇!
本來想好好籌劃呢兩年嘅生日, 但身體唔配合, 就學習隨心算喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
