琴日老公放工入屋, 話聞到有少少狗味, 唉! 梗係啦, 自己病到七彩, 又無好好打理佢哋, 都無本事清潔家居啦, 無味先出奇, 而且, 都好耐無同佢哋沖涼 :(
不過我都係過唔到自己, 雖然未完全好晒, 仲好似遊船河暈緊浪, 但老公咁講, 我點都要撐住幫佢哋沖涼; 平時同3隻豬沖涼有工人姐姐做善後工作, 我都攰到無命, 今日攪掂3隻豬, 仲要清理浴室, 同佢哋換過晒床鋪被套, 再換埋自己張床!
跟住再清理全屋, 蒸氣焗地, 吸塵打掃再洗晾, 做到開始有D虛脫嘅感覺!
用咗廿幾年工人, 真係唔慣自己勞動, 人...真係好難行返去之前, 都係死死氣靠僱傭公司再幫我搵過個!
 |
| 買咗個夾hold住風機喉, 都幫到少少啦! |
但呢個唔係致命傷, 最慘比達達嚇我一驚!
沖好涼餵完午餐, 佢都好正常, 但突然就見佢縮起前手, 個身僵直, 佢應該係將要抽筋, 呢樣真係會嚇到我無命!
好彩今次我有抽筋藥, 即刻抱起佢叫住唔使驚, 立刻餵藥, 只係幾秒間佢放鬆番喇; 好彩達達好夾順勢療法, 今次平安過關, 無咗藥傍身我真係唔敢想!
食咗藥嘅達達好快就瞓著, 呢set順勢療劑其中有樽草本, 係要令佢calm down, 見佢瞓得好好我先放心番!
然後自己坐低定一定神, 先發覺自己成身震晒, 震到好似一棵大樹比大風吹到葉都落埋, 我係過勞還是太驚嚇?!
好彩達達前排無事咋, 如果全家炒埋一碟, 我一定頂唔住啦!達達近來好hyper, 成日嘈暄巴閉兩頭跑, 我都唔知係好事定壞事啦!
從好嘅方向去諗, 當然佢係比之前有活力; 壞方向嘛, 性格有改變都係擔心啦!
正能量!!! 小毛病控制好就算喇, 擔心係於事無補啦, 最近自己一病就領悟到人嘅力量太渺小喇!
唔再將呢D煩惱放心上, 要嚟嘅始終避唔到, 無謂再嚇自己啦, 仲有幾日就係豬仔嘅9歲生日, 祝願佢哋身體健康, 我別無所求喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
