2019年1月3日星期四

新年之始

2019年過咗3日喇, 對我來講呢個新年都麻煩多多, 首先自己出現肩周炎, 真係苦不堪言, 痛症係好大折磨; 但阿女去咗台灣又未返港, 都要死頂去照顧貓貓, 基本生活照顧唔少得啊!
自己點都可以頂住, 最慘係大除夕夜波波有唔妥, 見到佢行唔安坐唔落仲嚶嚶叫, 就知死火, 呢個仔已經唔係第一次大時大節出事囉; 幸好我好快搵到源頭, 又有順勢療劑幫助, 今次亦幸運click中咗, 好快舒緩狀況, 唔使新年初要跑急症啊!
到今日自己同乖仔情況都算已缓和, 阿女亦已回港, 我可以多D時間休息, 先有心情寫吓blog!

咁都唔係一面倒無好事到嘅, 最感恩見到達達有好大進步, 自從新加入咗藻心沛呢隻功能性補健品, 明顯見到佢精神好咗; 最開心係困擾多時嘅鼻水問題, 已靜靜消失, 打乞嗤都衹係偶然聽到, 同之前打過不停, 面毛濕濕, 真係分別好大啊; 仲有係腳仔都比以前有力, 應該係有關最近加入嘅幾種補健品嘅幫助!
真開心用對咗呢幾種supplement, 有liposomol vit c, Manuka honey, cbd oil等等, 當然仲有主力補心嘅supplement藻心沛同customized 順勢療劑, 幫到達達心仔越來越好, 再無抽筋!

無鼻仔濕濕鼻頭好滋潤

見到達達嘅進步, 胃口亦好好, 實在好感恩, 至於波波蛋白尿問題, 再慢慢拆解見步行步, 現階段仍好, UPC亦未係高; 最安慰見佢仲係食得瞓得精神好, 仲有空間比我嘗試用補健品去做, 食補一定勝過藥補!
但願乖仔都好似達達, 對補健品一樣接受得咁好!

把緊時機要再補貨

半年前, 從某網店訂做咗一個皮革雕刻匙扣, 不經不覺一等半年, 日前終於收到; 打開一睇真係有驚喜, 活靈活現再見到年輕時嘅波波😀, 不過, 同一時間亦感慨真係歲月催人老!

皮革雕刻應該高難度, 我怕做得唔似, 唔想三隻豬仔一齊做, 今次係先做寶貝仔波波, 見到制成品做得咁好, 咁兩個女都一定要做啦; 可惜店主回覆, 師傅暫停接單, 要先完成手上訂單先會再接單做, 事實呢類手功制品, 全靠一雙手無得分工; 要求店主將兩個女先放入waiting list, 等師傅開放接單時, 我唔會missed咗先好!
同大家分享吓呢個超精緻手功藝術, 實物嘅雕刻非常細緻, 上色亦好靚, 見到眼仔嘅顔色非常真實, 希望可以排到做埋兩隻豬女, 師傅好快接單再做啦!