facebook又彈出過往嘅回顧, 今日講及達達胃口唔好, 一望日子原來已經近 3年前, 原來達達胃口出問題已經有咁多年, 都唔知應該係感恩, 咁多年都仲食到, 定係擔心佢表現唔好...
感恩喺小心照護下, 達達嘅日子都算過得有基本生活質素, 胃口就真係好飄忽, 時好時唔好, 但還好即使係要餵食, 都祇係用匙羹hand feed而唔使用到針筒force feed, 佢都仲肯一啖啖乖乖吞落肚!
其實波波都有一段時間胃口唔好, 感恩呢D壞日子已經過渡, 幾時達達都會有進步?
 |
| 又鬧人啦, 咁多嘮叨! |
老實講要手餵當然都係唔好, 不過, 要手餵嘅日子唔算太多，一星期要餵幾餐已經算執到😝; 健康正常嘅狗狗點使出盡八寶, 不停轉換餐單祇求佢胃口好, 即使係咁, 都感恩兩年多來, 佢仲陪伴喺我身邊, 仲係惡死騰騰大聲鬧人, 中氣仲好好！
12歲半喇, 心仔健康又唔好, 往後嘅日子每過一日都算係賺到, 但願達達公主開開心心, 舒舒服服咁行以後每步路!
唔知係咪天氣唔好, 波波腳仔狀況我好難控制好, 琴晚又出現狀況, 一如之前咁屁股著地不停咁轉但坐喺度!
唔知佢係膝關節移位未能復位, 還是坐骨神經痛, 手忙腳亂幫佢拉腳仔, 再立即餵順勢療劑, 搞咗一輪佢先可以放鬆!充滿無力感, 行出廳拎起豆b抱枕同豬豆傾訴, 叫佢可唔可以幫吓媽媽, 守護細佬😣!
 |
| video |
今日波波已一切恢復正常, 當然比較以前係唔好, 但叫做可以正常慢慢踱步, 唔跛吓跛吓已經好滿足; 感覺佢膝關節移位日益嚴重, 每逢轉彎都膝蓋骨滑出!
好怕佢當自己無事咁行快步, 更怕佢猛轉圈poo poo; 好矛盾...怕佢膝蓋磨損更嚴重唔想佢再郁動, 但又唔想佢唔郁至令肌肉萎縮, 只好毎日限制佢行動!
 |
| 波波毛毛開始乾旱, 但呢D唔會痛, 我唔再在乎! |
R哥哥叫佢做多D企立運動, 重心移後可以強化佢後腿肌肉, 呢個似乎係唯一安全嘅做法, 佢企定就唔會膝關節骨滑出!
年紀大喇, 佢身體狀況唔適合麻醉做任何手術, 我都只求可以保住佢唔好痛痛!
今日睇咗一篇貼文, 我都頗有感觸, 筆者講到自己對人對事都要求高, 但佢慶幸身邊有狗狗, 相處過程中提醒咗佢凡事唔會有完美結局!
我都從狗狗身上學習中, 退一步海闊天空, 唔再追求佢哋有完美嘅健康報告, 只求佢哋活得好, 喺佢哋有生之年, 我盡最大能力比佢哋幸福!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
