 |
| 點忙都帶佢哋出去遊吓車河啦! |
阿女又飛, 又要兼顧埋貓b!
琴日帶波波覆診眼仔, 今日見R哥哥做激光治療, 早兩日終於竄咗出去拜山, 其餘時間要幫阿女零星打點, 呢個星期嘅schedule迫到爆, 估計都應該仲要忙一段時間!
按預約時間帶波波見眼科熊醫生, 經詳細檢查後, 話波波眼仔無發炎無進一步惡化, 情況穏定, 下次可以半年後覆診; 再請醫生幫忙聽聽心肺, 聽診後話心肺都清, 心無雜音無異常發現, 聽到呢個答案真係天大嘅blessing!
 |
| 波波見眼科熊醫生最無壓力, 都係講夾啦! |
因為診所搬咗地點, 我呢個路盲當然又擔心, 最怕盲摸摸四圍搵, 幸好老公有時間做我盲公竹帶引, 不過又要留低達達我都係有擔心!
還好近日工人姐姐已經回魂, 見佢都可以安守本份, 可能佢自己嘅難題已經解決, 無再咁失魂!
一路用手機遙距監控住達達, set好webcam錄影返去再重溫, 起碼如見到有唔妥, 都可以有跡可尋!
 |
| 從webcam見到, 姐姐都算合作, 一直坐定定望住達達! |
今日帶波波見R哥哥, 做埋今次嘅激光治療, 決定中途休息再諗諗, 見近呢兩次做完laser後, 好轉嘅時間更短暫, 應該係佢膝關節移位問題比之前嚴重, 結構性問題唔從根本處理, 要有好嘅效果幾近無可能; 已經無間斷每星期都去做復健, 發覺靠周邊幫助效果好少, 祇可以維持住基本, 我都要開始諗諗, 要唔要搵個輪椅比佢仲放心😖!
 |
| 相片連結 |
老公話唔使咁悲觀, 波波只係行得唔好, 又未係行唔到🙄...
我無悲觀, 只係想搵D輔助工具幫吓, 希望佢會行多D鍛練返後腿肌肉, 唔使就住就住行得咁慘; 今日問R哥哥意見, 佢話可以考慮吓用護膝, 波波未係行唔到嘛, 不過有無咁細size都要搵搵!
要考慮波波是否接受啦, 之前個bomper ring佢都抗拒, 做咗比佢最後都係唔肯戴; 但老公話試啦, 唔試過點知佢反應, 咁希望哥哥幫佢搵到超細嘅size啦!
 |
| 波波已經好乖, 叫佢做鍛鍊無偷懶 |
無養毛孩嘅親朋戚友都取笑我, 話未見過有人養隻狗養到壓力咁大!
我好難令佢哋瞭解, 我嘅毛寶寶喺我生命中, 佔嘅比重係極強大😘！
好似馬不停蹄, 呢排變咗個大忙人, 近呢個星期經歷咗波波情況令我亦憂亦喜, 喜嘅當然係佢眼仔情況穩定, 我暫時可以鬆一口氣; 憂嘅係波波腳仔又變差, 連講句時好時壞都難, 好似近來無好轉時間; 希望係天氣影響, 近日好多毛孩風濕病發, 波波又跛行😞!
每日都好似有好多嘢要跟, 咁都好, 少咗胡思亂想嘅時間😝!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
