 |
| 相片連結 |
仍然keep 住每星期帶波波做激光治療, 每次做完當日效果都明顯, 係行得快咗同自然, 但呢個結果維持嘅時間好短, 一到翌日又回復如從前; 呢個時好時壞嘅局面唔可以叫做有進展, 已經堅持咗3個月, 呢條路好似沒完沒了, 仲係原地踏步無向前!
曾經見過波波係有好轉, R哥哥仲話可以運動升級, 叫我買個Bosu Ball訓練佢用後腳平衡, 推動重心向後移, 呢個運動可以強化後腿肌肉, 對佢有益處; 本來隻豬仔都做得幾OK, 但突然又洩咗氣...
 |
| video |
老實講我係有D氣餒, 雖然明白呢個係結構性問題, 唔做手術係永遠無得解決, 但眼見日復日咁帶住波波做復健, 好似幫到極有限, 心裡面奢望有嘅好轉已逐漸幻滅, 無咗mentally嘅支持, physically就感覺好疲累, 無咗團火推動我再衝前!
或者我要考慮停一停先, 睇吓唔繼續落去會係點? 係加快速度衰退? 還是一如目前!
反正近日阿女需要我幫忙, 時間上分配緊拙, 就從下次劃個界線!
今日同R哥哥商量, 佢都明白繼續落去係要付出一定代價, 好現實係時間同金錢; 當然堅持落去係一定好過唔做, 但亦瞭解只係周邊幫助, 波波呢個情況係無得復原, 呢條復健之路要不停用錢堆砌, 而我見到嘅進步時間又維持好短, 行得好只係幾個鐘就完; 佢同意我試停吓, 睇睇情況再搵個平衡點!
R哥哥好專業, 好明白每個處境有分別, 波波係膝關節移咗位, 呢個情況好明顯唔可能靠復健治療, 只係我仍希望盡量幫忙, 希望波波唔好痛唔好再有關節炎!
暫時比自己一個緩衝期, 透透氣再詳細考慮, 會陪波波繼續作戰!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
