2019確實唔係好時年, 去到近尾聲, 都有網友嘅狗狗身體抱恙要入院, 不過上天一定會眷顧小寶貝, 小朋友定會好快康復, 唔會叫媽媽掛念!
祝願來年會比今年好, 我哋一齊將一切消極、悲痛、煩腦、憂傷、茫然、無助、疾病等拋棄, 帶上感恩、微笑、快樂、健康、吉祥, 邁向2020年!
我哋不曾走過1010年, 亦無緣走到 3030年, 咁一生中今年係最珍貴嘅一年, 波波、達達祝福大家一切安好, 新年進步, 喺2020年活得色彩繽紛!
Christmas Eve也好, New Year Eve也好, 咩節日都好啦, 我同老公都一定唔會出外, 唔會留低兩隻豬仔自己搵慶祝節目, 可以守住兩個寶貝度過每一個節日我哋已經好滿足, 兩隻豬仔平平安安就係我哋最大嘅幸福!
 |
| Video |
留喺屋企當然要幫波波熟習吓個輪椅點用, 雖然唔可以話佢有好大進步, 但明顯接受度高咗, 一放佢落去佢已經識自動起步,但都係橫衝直撞亂咁衝!
我諗佢睇唔到, 要佢行直線係有難度, 祇要佢亂撞自己唔驚, 我就當佢玩碰碰車由得佢亂咁碰😁 !
不過行地墊佢推動個輪椅要較費勁度, 但放佢出地磚滑行太快佢又唔敢郁, 所以每次練習我祇會比佢用好短時間, 寧願密D用, 唔想佢太勞累怕佢傷咗肌肉!
希望熟習後可以帶佢落樓下運動運動, 空間夠大唔會碰撞可以自由咁衝, 喺水泥地上推動個輪椅佢應該較輕鬆, 雖然係要倚仗4個轆, 但想像吓佢可以再次跑步我已經好滿足!
我已經奉行喺不完美中搵完美, 咁自己會較舒服, 條路上天係安排好, 一切有定數, 我祇可以努力去行好每段路!
達達仍然照舊胃口飄忽, 早午晚三餐都要玩吓人, 明明早餐食得開開心心, 中午遞到埋口都要一手推開仲背轉身, 要又哄又氹; 晚餐準備好手餵我已經拎定匙羹, 佢又走去自己大口大口吞, 呢個棖雞妹仔真係玩死人; 點玩都無問題, 總之要keep住精精神神日日鬧吓人😛!
新年前夕做個回顧, 我為佢哋選擇呢條醫療嘅路究竟好唔好? 最後都決定繼續咁做, 唔再執著去睇指數, 畢竟最重要係佢哋活得好, 其他唔再太在乎!
從前嘅我祇會聽獸醫指示照住做, 即使見佢哋反抗我都覺得係為佢哋好, 迫令服從; 但經歷多咗, 會去諗我認為嘅好, 同佢哋覺得嘅好係咪有唔同?
再經過之前幾次帶波波抽血唔成功, 佢拼死咁反抗我好肉痛, 達達見一次醫生崩緊到攤軟幾日精神先恢復, 我有所領悟!
由緊張、堅持、開始覺得太堅持係咪對佢哋好? 究竟係求生定係求正常化驗指數? 比咁大壓力身體會好?
經過再三反思, 唔想再忽略佢哋嘅感受, 唔再固執咁堅持所謂正統, 已經呢個年紀, 寧可佢哋快樂咁行每一步!
當然放開唔係放棄, 祇係平衡輕重, 唔需要太睇重成績表上嘅分數, 睇佢哋日常表現為準, 其實依家我覺得幾好, 兩隻豬仔同我都較前輕鬆!
真係好感恩認識到順勢治療, 更感激Homeopathic Practitioner 嘅指導, 會因應兩隻豬仔不同症狀建議適當嘅療劑, 甚至可以貼身打造, 最最感恩當然係要夾得到啦!
當然都好感謝Dr.Fung, 感激佢肯配合我要行嘅路, 當兩隻豬仔有需要回歸正統醫療時, 唔會將佢哋拒之門外, 肯為佢哋做consultation, 今時今日咁大度嘅獸醫已經寥寥可數!
喺FB上見到有貓媽媽嘅留言, 原來有同路人我並唔孤獨, 我會更堅定去走呢條路!
"照顧也好, 治療也好, 安寧療養也好, 從來不是一條單向直路; 生活質素, 也不是單憑數字便能計量。
回頭看才發現, 其實他一直都在用行動回饋我, 哪些才是最好選擇、哪個才是最合適的方案。
每一天都不知道還能有福氣跟你走多遠。但是長是短, 我都會好好陪著你。感謝你總是願意讓我陪你走。"
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
