2021年, 第一件遇到嘅開心事, 係收到陶土做嘅波波公仔, 真係有驚喜!
做手功呢門事, 真係好難由個腦去話事, 腦中有嘅影像雙手未必配合到, 所以我唔會期望過高, 免得失望難為自己; 之前所有訂制嘅肖像畫, 都非要自己動手改過先可以, 其實好細微嘅要求制造者可能唔知, 只有係媽媽先會留意到咁微細嘅唔似; 要一個陌生人用一張相去做一件作品, 難度高可想而知!
如果件作品係唔可以自己改動嘅材質, 就同自己講有7成相似都應該滿意, 要學習欣賞手功創作而唔係單純追求100%相似, 老實講如果要圖畫相似, 影相就可以, 立體figure要求分毫不差, 應該一早去做3D!
我自己都鍾意做手功, 之前自己做羊毛氈公仔, 真係做到幾分相似已經好滿意, 當然我都追求完美, 所以交託專業人士, 有較高要求係可以, 但絕對唔會吹毛求疵!
今次收到波波, 唔識形容我嘅驚喜, 以致激動落淚, 因為實在太神似; 我覺得好幸運, 可以有呢個波波豬, 感覺乖仔返咗嚟屋企, 同我再不分離!
老公放工返嚟拎比佢睇, 佢凝神望住....無語, 然後佢問, 可唔可以做1:1? 即係佢都認可波波做得好似!
立刻揀相再做, 一定要先做齊3隻豬, 仲有我心愛嘅叻叻, 我都唔會忘記!
其餘4寶要慢一步了, 年代久遠搵相唔易, 自己都要緩一緩氣!
再等待, 期待再有驚喜!
或者有毛孩家長都有興趣, 事實好多朋友見我分享喺FB, 都有問我網址, 我亦樂意分享, 因為上次做浮雕時都有好多人想知, 希望上咗彩虹橋嘅寶貝回歸, 我當然有呢個同理心, 亦明白大家嘅心意; 但要聲明我無任何得益, 唔係做廣告, 只係希望大家都開心歡喜, 有興趣嘅你哋可以上網google "you and me 創意禮品店"就OK!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
