近呢幾日, 我又有兩次聽到波波嘅叫聲, 我已經唔會再懷疑是真是假😅, 只要自己感覺良好, 我就信乖仔係返咗嚟仲喺度!
無所謂話咩太牽掛會阻礙佢投胎, 又話會阻住佢開展新道路, 我相信乖仔嘅選擇就好, 佢想點做就點做; 正如我自己, 都唔再擔心做某樣嘢究竟好唔好, 最好都係順住自己感覺去做!
波波離開咗快四個月喇, 不但無感覺稍好, 仍然係好掛住佢, 連帶想念起離開咗嘅每一隻毛寶寶, 會回憶起當日相聚嘅每個片段, 雖然生活上都係有甜有苦, 但每想到當年嘅離別, 最深刻嘅感受仍然係苦....
又發起癲要做紀念品, 今次做咗兩套陶瓷吸水杯墊, 呢樣放喺餐檯上用, 每日必定接觸到; 收到貨時又係一個驚喜, 造工精細印刷完美, 將相片直接印刷落塊陶瓷磚上, 唔係打印相片後再裝裱加工!
我好似無以前咁多要求, 比以前容易感到滿足😜?!
近來天氣好凍, 凍到都唔太想郁, 達達都係一樣食飽就搵周公, 呢個女年事已高, 要特別關顧, 唔可以凍親怕佢感冒, 又要小心佢筋骨風濕痛, 總之要小心照顧; 閒時按摩照針灸筆就唔會少做!
都係做得嘅就盡做, 希望佢每日都過得舒服!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
