 |
| 我希望我會照顧到達達更好 |
終於睇完呢本書, 用咗最長嘅時間慢慢細讀!
喺同類型嘅書本中, 呢本係我流咗最多眼淚嘅一本, 因為書中陳述嘅好多遭遇, 都真實咁呈現咗自己嘅經歷, 而佢描寫照顧者嘅心路, 簡直係將我當日照顧波波嘅心情重覆; 一路睇住本書, 就如同複印當日走過嘅路, 每睇一頁都好似往心頭落下重撃, 心情沉重!
流住眼淚慢慢細讀, 我有好多想法, 好想同大家分享, 但到我真係想寫, 竟然無法表達, 太多情緒交集⋯
祇可以講, 呢本係一本非常值得睇嘅書, 如果我早啲接觸到呢本書, 喺陪伴波波嘅最後一段路, 我哋一定行得更好; 我會參考書中好多別人寶貴嘅案例, 加以調整混和自己嘅生活好好去做!
如果今日喺你身邊嘅毛寶貝年事已高, 或者有長期病患, 我覺得睇呢本書有一定幫助, 因為你喺呢個階段承受嘅苦, 未必係你身邊嘅親朋好友會感受到, 但喺呢本書, 你會搵到有人正同你行緊相同嘅 路, 有同路人感覺無咁孤獨; 亦搵到好多實質嘅建議, 你可以自己消化下, 再加以整理去搵出自己應該要行嘅每一步!
 |
| 對你, 將來及現在嘅每一日, 我希望會比以前做得更好 |
好impressive作者有對照護者心靈嘅關顧, 呢個亦引發我最大嘅感觸, 有好多次睇到泣不成聲未能繼續.....
我一定會再重複閱讀, 因為每一次閱讀都會帶比我唔同嘅感受, 會有更多時間調整自己做得更好; 雖然, 大部份人都係會感覺自己做得未夠好, 咁未嘗唔係好事, 即係你仲有空間去進步!
今日回望, 好可惜我太遲知道呢本書, 不然喺陪伴波波行嘅最後一哩路, 我應該做得更好, 我肯定大家都會過得比較舒服; 我指嘅係心靈上有更好嘅歸屬, 去到最後階段, 心靈上嘅慰藉更勝肉體上嘅照顧.
好遺憾去到最後, 我陪喺乖仔身邊有嘅都係擔心, 怕佢辛苦肉赤佢受苦, 無好好靜心聆聽大家嘅心, 無好好享受最後喺一齊嘅親密接觸!
東拉西扯講咗一大輪, 好似都未能夠將呢本書嘅重點帶出, 但我本人真係覺得呢本係好書, 有養毛孩嘅你必讀; 即使你毛孩仲係年輕嘅寶寶, 但都會必經生老病死呢條路, 到時你會做得更好, 將遺憾可以降低, 當然最好係無!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
