冠狀病毒疫情嚴峻, 政府推行新措施, 如果發現周邊有人確診, 會突撃封區檢測, 強制隔離, 又令我開始再度緊張; 緊張嘅原因當然因為有達達, 我諗有好多毛孩家長都同我有一樣嘅擔心！
呢個女雖然表現無波波咁緊張, 但性格自我又倔強, 之前貓貓來探佢, 佢唔鍾意可以完全唔理自己瞓覺, 但過咗一日心情好咗, 又主動搵貓貓玩佢當好平常!
不過佢對唔熟識嘅環境好有戒心, 最簡單講返以前, 喺圍欄門外換張地氈, 佢就唔敢行出來, 因為地氈唔同咗樣; 最近屋企換咗地氈, 又要從新陪佢學行, 見佢步步為營咁真淒涼, 佢呢個心結一直都解唔開, 咁多年來都一樣!
要承認達豬具體情況當然比以往更差, 年紀大咗身體素質當然下降, 眼仔睇唔清楚, 聽力亦有障礙, 還好係觀察能力仲好強, 所以我開始懷疑佢究竟係咪有老人癡呆?
轉圈其實好多年來都一樣, 可能以前細個喺寵物店困籠有影響, 時常叫嘛可能因為有聽力障礙....
之前, 可能因為心有病, 肺壓高方面嘅影響, 好多因素導致判斷錯誤, 好多symptom夾埋就估計去咗腦退化方向, 依家算係病情穩住, 就感覺佢表現兩様, 總之佢近來比我嘅感覺反應都頗強, 又無再亂叫好難再從癡呆方面聯想!
唔敢話佢叻, 都衹係順住情況去幫, 飲水飲湯三餐要專人侍候, 肉同菜要攪拌成糊狀, 又要分開時間上, 仲要唔遞到埋口佢就唔食, 唔會妥協一於無商量!
其實依家只服侍佢一個, 大把時間做多啲又何妨? 見佢食到㗳㗳聲, 於我來講, 係好療愈嘅音樂😄!
不過, 慣性服侍公主, 又餐又藥, 仲要係順勢藥, 食法次數唔同平常, 仲要觀察住勢色唔對要比佢即入氧氣箱; 就係因為咁, 如果萬一強制隔離我真係驚, 點可能叫其他人做到我咁樣? 真係攞命😖!
我自問真係非常小心, 最擔心工人姐姐, 所以佢每出外返來, 我都要佢即入厕所換衫沖涼, 但仲有外圍其他因素會影響嘛⋯⋯
波波, 你要保佑達達, 保住唔好比啲意外攞佢命😅!
唉, 毛孩年紀輕嘅都會擔心, 何況係老人家又有長期病, 真係好驚!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
