達達近來好曳曳, 夜晚係都唔肯入箱聞氧氣, 要上大牀打泰拳挖被挖東挖西!
話佢近來情況好好? 有精神搞咁多花招, 但我又唔覺得佢有進步; 話佢差咗又唔係, 都係時好時唔好, 老人家正常習性咁活落嚟!
波波離開後我都繼續租用個氧氣機, 一來係買個保險以備不時之需, 達達心臟唔好嘛, 二來我諗應該都有助緩和肺壓高, 想比佢保養吓個心仔; 只係每晚比佢入去幾個鐘, 其實佢應該好舒服, 但最近放佢入去就係唔肯坐低仲不停吠, 我真係唔知佢搞乜鬼?!
唔可以同佢鬥耐性, 我忽視佢咩, 佢可以不停吠, 結果老公就會忍唔住抱佢出嚟, 一放佢上大床佢就乖乖瞓低, 老公就哈哈大笑用隻手掃吓掃吓隻豬仔, 叫我要順住公主脾性而為😤!
我租部機返嚟要每個月比租金, 公主你賞個面一日用幾個鐘都唔難為啦, 明明舒服唔會辛苦, 點解係都要上床同我哋迫埋一齊? 點解咁曳曳?
租部機返嚟擺景嗎? 我又唔覺得佢靚仔, 但係又唔敢退租, 怕撞正供求失衡需求高時, 急用時無起上嚟, 就會如熱鍋上嘅螞蟻, 我邊敢要公主受苦, 梗係唔敢任意妄為啦😓!
今日換個時間, 日間試比佢入去瞓一陣間, 佢又好順攤, 呢個女好識恃寵生嬌把握時間, 知道老公未放工返嚟就份外乖, 你話佢有腦退化我要重新估計喇!
不過感覺佢有少少改變, 性格溫馴咗, 間中會嗲會比我抱吓!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
