今日立春, 就過年喇, 今日要開開心心!
琴晚, 一如往年一樣都會封吓利士準備過年, 雖然今年疫情關係, 應該都會少出外, 但做慣嘅俗例唔會改變!
每年都會為家人準備利士做壓歲錢, 年三十晚放喺枕頭底, 祝福新嘅一年有吉星高照!
以往都會放喺豬仔嘅床仔, 今年嘛.....波波已離開, 當我照常準備壓歲錢時, 眼淚突然湧上眼眶內打轉; 但叫自己唔好喊, 中國人嘛, 都講意頭, 雖然在我來講, 我一向都唔care呢啲所謂嘅召頭, 但心裡面仍想為家人保有住福蔭綿綿吧!
波波走咗呢四個多月來, 真係流咗好多眼淚, 以為自己已經慢慢恢復過來, 但原來只係自己潛意識避開想念!
每晚深夜戴住headphone聽歌, 聽到虐心嘅歌詞, 就會忍唔住又來做個視頻, 來來回回遊走喺波波嘅相片中, 隨住歌曲同波波嘅相片, 一幕幕往事就喺眼前不斷循環出現; 我真係好珍惜呢個深夜時份, 亦好enjoy做呢啲視頻, 都唔知做咗幾多呢啲無聊, 但從歌詞中搵到共鳴去舒發情感, 可以肆無忌憚咁將眼淚隱藏喺黑暗, 瞓醒明日又翻篇!
呢幾個月, 阿女同老公努力幫我改善, 調整情緒唔好咁負面, 因為依家少咗出外, 困喺屋企就做少少改變, 換咗部份傢俬同地氈, 等我唔好時時睹物思人又眼淺, 其實呢啲根本對我唔會有任何改變!
買咗新嘅物件, 理所當然又要拋棄一啲唔再有嘅需要; 老公叫我放棄張網床, 話達達一個根本唔需要, 自從呢個女跟咗我哋上大床瞓喺我身邊, 呢張床仔好大段時間都係波波一個獨佔, 依家波波走咗, 再留都無必要!
聽老公咁講, 我個心即時好似爆裂, 直篤中我淚點, 呢張床仔承載住過去太多回憶, 要做斷捨離真係欲斷難斷....
我好清楚波波已離開, 最珍愛嘅已經唔再喺我身邊, 一件死物又有幾重要?
對波波, 我真係有執著嘅愛, 以至漫延到一切周邊!
 |
| mp4 - 執迷不悟 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
