呢段日子一個'攰'字就可以形容, 除咗精神疲勞, 仲要體力勞動, 琴日已經開始全身骨痛 :(
屋企要換冷氣, 分體機要搭棚已經麻煩, 仲要完全無諗過換一部機, 要攪到覆地天番!
錢比晒, 棚搭好, 機又送到, 只係等師傅; 點知師傅大人架到, 一句有牆櫃阻住裝唔到, D喉管過唔到好難做, 叫我哋要將入牆櫃拆晒咁就走佬, 淨低我同老公企咗喺度, 猛諗要點做好?
拆兩個入牆櫃唔係小問題, 工程太大; 但又唔可以唔裝冷氣, 真麻煩; 結果要再搵過另外嘅師傅, 同我哋諗最簡單要點做; 佢話即使牆櫃唔使拆, 但敲除背板同驚動天花都難免喇, 咁總算好過要拆櫃啦!
同老公, 工人姐姐齊齊出動清空兩個櫃, 已經做到我暈吓暈吓, 行到好似騰雲駕霧, 仲面對幾個師傅又敲又鑽, 攪到一屋木屑牆灰, 見到頭都痛, 又要安撫3隻豬仔入房免受驚嚇, 呢個最緊要啦 :(
過去呢兩星期, 真係忙到想死, 日日抹抹抹, 無可能靠姐姐一個做, 唯有頂硬上同老公一齊拼命啦!
今日暫告一個段落, 櫃封返好, 牆洞已補, 機已裝好, 但一撻撻咁仲要搵油漆師傅!
先回一回氣, 遲少少再繼續 :(
還好3隻豬仔呢段時間無大病痛, 但有小毛病就難免啦!
可能天氣差, 波波同達達都試過縮起手有疼痛徵狀, 係風濕還是骨刺吉到神經痛, 就不得而知喇; 一痛佢哋就驚啦, 硬晒唔識行, 我即用順勢療劑幫佢哋舒緩, 再按摩吓, 大概半分鐘就正常返; 近排轉天氣, 誘發好多毛孩出現不同症狀, 點忙都唔敢唔做保養喇, 我又真係因為忙而疏忽做少咗啦!
仲有就係波波豬, 佢眼仔都令我擔心嘛, 雖然Dr. Ma檢查後話佢眼壓已經正常番, 但佢都仲有卒眼 :(
怕有更深入嘅原因, 普通GP未有儀器協助下難觀察, 都係再帶佢睇多次專科啦, book咗下星期到 VSH專科醫院見一次Dr. Chow, 做個詳細check up安心D喇!
豆b情況唔太差, 但都唔會expect佢有好轉喇, 一直都唔肯自己進食, 全靠hand feed咋; 咁間中都會心情胃口好, 肯自己食吓!
雖然佢情況好反覆, 但見到佢會嚟廚房等食, 仍係好開心, 希望會見多D呢種情境啦 !
已經盡力扭轉佢有惡病質Cachexia嘅狀況, 體重算係慢慢回升返, 我都唔敢強求有大突破, 亦唔想再探究佢依家嘅病況喇, 但求呢種風平浪靜嘅日子可以繼續, 大家都有個喘息嘅機會, 心滿意足!
