 |
| 今日去覆診 |
今日先有心情講返波波嘅情況, 兩星期前見波波成日用手仔卒眼, 但唔見有腫亦無血紅, 已經用生理鹽水幫佢清洗, 再用膠體銀抹眼, 滴埋人做淚水都唔覺有舒緩, 開始擔心 !
見佢行幾步就用手去撥, 好似好唔舒服, 我仔細望過去, 就覺得佢用力瞪大對眼仔, 唔通係痛?
呢個仔對眼由細我就擔心到大, 已經睇過專科, 都叫我放心嘛; 不過已經過咗2年, 都怕有變化, 都係睇吓醫生安全D啦!
 |
| 等緊見醫生 |
即刻約醫生, 等咗兩日, 今次係我第一次睇Dr. Ma; A之前帶佢嘅狗狗做過body check, 有唔錯評價, 叫我可以試吓; 今時今日有急病要即時搵個獸醫好難, 無兩手準備會好慘, 試多個做保險都有必要啦!
好彩有帶波波去見獸醫, 檢查下發覺佢右眼高眼壓, 眼壓更高形成青光眼就會盲, 抹一把汗啊!
Dr. Ma話情況唔算壞, 試用一隻最mild嘅眼藥水, 希望已經OK啦!
波波都有初期白內障, 都有另一隻藥水滴眼!
到今日已經用藥10日, 要去覆診, 當然緊張啦, 感恩檢查過後眼壓已經正常返, 放下心頭大石喇!
仍需繼續滴藥水, 3星期後再去量度眼壓, 希望滴藥就可以穩定番; 從今後應該要定期覆診, 監察住眼壓! Dr. Ma幫波波檢查都好詳細, 雖然係睇眼仔, 但全身都有摸㗎, 只作眼測手觸聽診未作生化檢查下, 波波係唔錯架!
波波淋巴無腫大, 心臟無雜音, 心跳正常; 皮膚夠彈性水份足夠, 有腰仔體態唔差, 脚仔有力...祇係都有膝關節移位, 松松大多都有呢個狀況啦, 波波係1-2級唔算嚴重, 食D有關嘅supplement就OK喇!
我無提及自己用試紙幫波波驗尿, 唔想佢食西藥, 亦無提起有用順勢療法, 唔再多生枝節喇!
我會訂順勢療劑眼仔配方做輔助, 希望保住波波嘅眼壓, 唔好有青光眼啦!
多謝A兩次都抽空陪我, 知道我一定會緊張又係路盲, 帶路之餘仲從旁提點我要問嘅問題, 我一緊張就會乜都忘記晒 ;)
我唔介意帶波波定時見醫生, 用滴眼藥幫得到已經好感恩, 而且我已經認得晒路, 落咗的士行兩步好容易嘛 :)
養呢3隻豬, 可憐我日日都要食驚風散, 有時真係好灰啊!
 |
| 唔再眼凸凸, 靚仔番喇 :) |
