今日帶波波去灣仔VSH專科醫院見Dr Chow, 每次要去見任何醫生之前, 都有忐忑不安嘅感受, 雖然表面睇落波波嘅眼仔無好大嘅唔妥, 但都係有擔心啦!
好怕深入檢查後發現一D嚴重問題, 影響個仔日後嘅視力咁就死得!
今次係第一次踏足呢間寵物醫院, 感覺係同一般唔同, 可能無做walk in patient, 每個appointment都有時間操控, 無人頭擁擁; 因為怕唔識路, 自己早咗到, 我祇見到一隻狗狗, 到我哋走時又有一隻入嚟, 整個氣氛都好安靜討好!
可能氣氛好, 波波見到其他狗狗都無吠, 祗係開始時有D緊張, 之後就relax到可以瞓低; 真係第一次見個仔喺動物醫院都可以瞓著覺!
之前去太平道醫院, 已經覺得高級數, 同人嘅醫院都有得fight, 怪不得有寵物養和嘅稱號, 但同呢度相比, 呢度更好!
我評論嘅完全係外觀嘅第一感覺咋, 咁當然一間好嘅醫院, 最重要嘅係醫生質素, 完善醫療設備, 同埋夾到個patient啦; 不過姑娘親切嘅笑容, 環境寧靜令人情緒放鬆, 絕對係好 :)
今次係第二次見Dr Chow, 兩年前帶波波睇眼仔專科佢仲喺太平道, 今次換咗地點, 但周醫生仍然係一樣咁好!
所有程序逐一做, 眼底無事, 連淚水分泌都check埋, 得出嘅結論係一切正常; 就連兩年前話波波有嘅先天白內障都無範圍擴大, 仍係中間好細點, keep得幾好, 呢樣可能用順勢療劑做保養都有幫到; 雖然唔可以醫得好, 但keep到已經極好:)
致於波波常卒眼, 可能係佢眼仔頗敏感, 天氣轉變影響佢敏感都有可能, 呢個仔對眼一直都係敏感過人 :(
而眼壓高就要一星期後再覆診, 因為我一直有滴藥, 要我先停藥再覆驗, 今日嘅眼壓就係正常嘅!
Dr Chow話量度到眼壓高, 其實有時會有誤差, 最簡單嘅如果hold儀器嘅角度, 同波波眼仔配合得唔好, 量出嚟嘅度數都會偏差, 要量度多次較好, 咁當然仲會有其他好多不同影響嘅因素; 但佢覺得波波有青光眼嘅機會唔大, 不過都唔好靠估, 停滴眼藥水一星期後再check就清楚知道, 今次開咗一枝眼仔敏感嘅藥膏!
雖然一星期後嘅結果未知道, 但個心就無再七上八落, 起碼知道佢眼仔仲好好, 就算真係要靠滴眼藥水, 都有藥可用!
致於話見到波波嘅眼球白白哋唔係白內障, 係老化跡象, 任何器官老化都一樣, 係無得逆轉無得醫, 祇可多加保養!
睇咗專科真係較安樂, 希望一星期後覆診result都係咁好啦!
link: VSH專科獸醫醫院
