 |
| 波波正接受靈氣治療 |
越嚟越覺得自己同以前好大改變, 以前乜都講科學根據, 無有力數據支持, 我會存疑, 更唔會嘗試!
但養咗呢幾隻豬, 養到我講個服字, 做咗好多未做過嘅嘗試!
以前養5寶, 有病祇睇西醫, 自己無做任何research, 仲好似輕鬆D, 但咁做係咪最正確? 真係見人見智!
不過, 無可否認, 用乜嘢醫療方法, 有數據支持係好D, 可以睇睇行嘅方案是否正確唔礙事!
但我諗都需要作若干變通, 有時淨靠數據去判定生死又好質疑, 總知各方面都作個調整, 大前題毛孩生活得舒服係首要考慮嘅事!
無論醫生、藥物應用, 好玄咁要講個"夾"字, 甲之熊掌乙之砒霜, 從古到今都有寓意, 呢樣我無質疑!
波波對chemicals好大反應, 呢個實例從6個月用滴頸藥開始得知, 曾經肝酵數高到嚇死; 然後咁多年落嚟, 每逢食過處方藥物後做血檢, 肝一定有事, 我唔敢, 亦唔想再試!
今次迫不得已去做麻醉, 再做蛋白尿測試, 結果都係無例外, 報告真係同上次好大差距, 上次嘅lab test祇相隔兩個月, 但數值竟高咗一倍, 我真係想死; 明知山有虎, 偏向虎山行, 真係萬不得以!
我只好孤注一擲作新嘗試, 用整體療法, 希望波波身體會接受D!
琴日約見醫生, 第一次只做比較溫和嘅治療, 先嘗試用reiki同中藥幫佢, 慢慢做協調繼續多角度嘗試!
林醫生係註冊獸醫, 同好多外國嘅holistic vet一樣, 本身係DVM, 有心推廣整全療法, 不甘於醫療只局限於西方醫學, 希望將來喺醫療體系上拼湊得更完整D; 而目前佢提供嘅治療包括針灸, 艾灸, 中西草藥, 臼井靈氣, 花藥, 順勢療劑, 食療建議...等等.
我身為毛孩家長當然歡迎, 起碼可以有多一個選擇, 要用邊種醫療方法可以視乎情況發展而決定!
琴日波波做咗靈氣治療, 亦配咗中藥, 當然呢類溫和嘅治療無咁快見到效果, 祇要波波無出現排斥, 我會耐心嘗試!
無論波波夾唔夾, 將來發展係點, 但都好開心香港開始有呢個類別嘅獸醫!
 |
| 琴晚係食得好D, 食完自己嘅仲去搵達達個碗, 但呢D治療真係唔係一兩次就OK! |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
