 |
| 相片連結 |
波波脫牙仔已經十日多, 牙肉復原得好好, 食嘢無難度, 當然太硬嘅我都唔會比佢食, 無牙仔老人BB要多D照顧; 插喉後氣管敏感引起嘅咳嗽, 亦已經完全康復, 口腔問題得以完滿解決, 少咗一個大包袱; 今後集中保養腎臟, 睇睇蛋白尿要點攪先好啦!
琴日陽光好好, 出去曬吓太陽散吓步!
達達情緒都係唔好, 費羅蒙對佢起唔到作用, 每年冬季佢都會情緒好大波動, 連帶D毛毛都唔好;完全搵唔到原因究竟問題出於邊度, 當然我話嘅搵原因, 都只係一般驗吓血見吓醫生, 具體方向醫生都講唔到, 都認為即使做好多檢查, 答案都未必搵到, 咁我當然唔會要佢無啦啦受苦, 唯有從其他方向著手, 幫得少少都好!
今次我想試用Essencial Oil, 精油有治療作用, 當然用於動物要小心運用, 有好多精油對狗狗有毒, 嚴重嘅用錯會命仔都無; 即使搵到列表話對狗狗適用, 仍係好大路, 每個身體都唔同, 亦唔好盡信!
比方講某隻精油對一般狗狗適用, 但原來對有傾向抽筋嘅狗狗會引發病狀, 要再深入搵多D資料先好!
連日來上網搵資料, 亦向有讀過精油運用嘅朋友求教, 再加上Ka有比我佢老師嘅formula, 綜合咗好多相關資料, 我決定試吓用; 打算用Diffuser, 比較安全唔敢直接按摩身體咁難度高 !
用於狗狗嘅精油一定要100%純度, 有任何雜質都驚有毒素, 最後決定咗從美國購入某品牌organic essencial oil, 呢個品牌來源有保証, 因為香薰大師Robert Tisserand 幫手把關, 每批精油都有報吿喺網上比買家參考, 如果該批次有問題, 根本唔會流出市埸比人買到; 每個批次 Robert Tisserand 都有 comment, 可以放心使用!
我呢個初哥媽媽好緊張啦, 最怕適得其反, 愛變成害嘛; 好心急等貨到, 希望幫到兩隻豬, 情緒得到安撫!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
