以前對一切神怪事件抱有懷疑態度, 見到有人講到眉飛色舞, 滿天神佛, 我會笑吓然後心諗你講嘅是否真實, 真係天知道!
間中聽看深宵電視節目, 有講述到靈異事件, 講到言之鑿鑿, 我都係唔會盡信, 感覺有D虛誣 , 會係博出位收視率高?
呢個話題從來結論都係'信'則有, '不信'則無!
雖然我無宗教信仰, 但對別人嘅信奉會尊重; 細個自己讀天主教學校, 每日早課必定唸天主、聖母經, 亦有神父上聖經課, 每日上下課必定要唸經祈禱; 而媽媽就信佛, 屋企有安放神位, 天官地主去恭奉; 從細就見媽媽每日誠心上香, 初一十五齋菜敬奉, 仲會好用心整理香爐, 當然媽媽媽都有教我禱告, 願望一家安好!
我從細就知道, 呢個世界上有好多不同教派, 但我好疑惑, 媽媽咁信奉觀音佛祖, 而學校又信奉天主聖母, 講述耶穌; 我細個嘅時候會諗, 咁多神仙, 究竟邊個最偉大啊!
小朋友都係想法好奇怪, 乜都要鬥大, 根本對不同信仰唔瞭解, 我要知道邊個神係最大, 咁信佢就無壞嘛😜!
年紀漸大, 反而對所有信仰唔執著, 尊重個人信仰; 但自己就同細時嘅做法一樣, 入教堂會識祈禱念經, 到寺廟會識上香!
一切來得自然, 無所謂信仰, 當有困難挫折, 我都衹會向上天禱告, 祈求賜我力量!
在我自己嚟講, 呢種咁玄嘅事物好虛無, 我抱隨和態度, 但自從有豆b嘅經歷, 對靈異事件我開始接受到, 唔敢再抱質疑嘅態度; 自己見唔到, 衹係命中註定無必要遇到!
今日有咁嘅感想, 全因琴晚喺FB上見到一段討論, 講及狗狗離世後有否回魂, 之前我嘅狗狗甚或至親往生, 我都從未有過佢哋有返過嚟嘅感受; 唯獨今次小豬豆, 我喺有見到佢䑃朧嘅身影, 亦有好特別嘅感應, 可能我同佢緣份好深!
 |
| 豆b好少上我床瞓, 今日睇吓1年前嘅佢, 就見到佢喺我床上瞓 :) |
FB上有不同嘅網友留言, 話狗狗走咗後第三日有回魂, 而我第一次見到小豬豆, 亦正正係佢走後第三日, 之後我仲有見過佢一次, 喺火化前三日; 然後, Ka同波波傳心, 就話豆b有交待唔會再返嚟,我就真係無再見到小豬豆喇!
每日總有千絲萬縷細微事叫我想起小豬豆, 呢種掛念刻骨銘心!
 |
| 網友嘅討論, 令我更相信我真係見過豆b返嚟 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
