今日同阿女結伴去寵物展, 反正已經叫老公攞咗假, 又多謝朋友送比我免費門票, 就去逛吓啦!
其實去呢次寵物展無任何期望, 以往一定會比幾隻豬仔做個交代, 媽媽出去係為佢哋搜羅小食; 依家兩隻豬好多嘢都唔食, 一來因為佢哋無咩牙仔無曬牙力, 想食都有心無力, 二來就算佢哋想食, 我都唔可以太率性, 要考慮佢哋身體依家係乜嘢環境, 所以今日無打算買小食!
行咗一陣買咗香薰碳酸鹽比佢哋浸浴, 話可以舒緩壓力!
除咗食, 實在唔知仲有乜嘢對我有吸引力, 補健產品我從來唔會望吓就隨便比佢哋食, 要做足功課呢方面我向來好勤力😉;著衫...波波從來都係負面表情, 達達亦唔見得會高興, 最鍾意著靚衫嘅豆b走咗, 我已經對買靚衫無曬反應, 諗住叫做到此一遊先心熄, 無諗過竟然見到一個產品咁有吸引力!
自從買咗部milky spa, 同豬仔們沖涼已經無咁吃力, 衹係吹毛仍然頗要耐力, 自己辛苦時兩隻豬都無耐性; 以前用風筒固然手腕受力, 自從改用風機, 拎住風喉算係好輕, 但狗狗對風機發出嘅噪音仍然唔安定, 達達算好D, 長時間波波更會郁唔停!
 |
| 見到Milky Spa兩個女嘅poster, 梗係要影相留念啦 😉 |
今日喺寵物展見到部寵物烘乾機, 實在扺擋唔到佢嘅魔力!
其實我對寵物烘亁機一向抗拒, 甚至有恐懼, 已經唔止一次聽到狗狗出去美容出事, 將狗狗置入密封嘅烘乾箱, 唔小心操控時間溫度, 狗狗器官熱到壞死!
但今次見到呢部機, 親身用手感受過溫度風力, 適中溫和而且頗安靜, 更可以加入緩和情緒嘅香薰同時有供氧設定!
我最關注嘅賣點, 最重要嘅佢唔係密封式, 況且, 我一定唔會將D心肝放入去烘乾, 任佢哋離開自己視線範圍, 務求做到意外係零!
再三考慮呢部機嘅好處, 主意揸定!
從此我唔需要咁辛苦為佢哋操作吹毛, 亦唔再有咁多飄毛於四週充斥, 而兩隻豬仔又可以舒舒服服瞓喺個保温箱內, 比最溫柔嘅暖風慢慢將毛毛吹乾, 應該會較冷靜.....
達達依家要鍛鍊腳仔肌肉, 要密密游泳, 呢部寵物烘乾機出現在最適當timing😌!
親身見過實物, 亦感受過唔錯嘅熱力風力, 再睇咗短片介紹, 簡直覺得無敵😄, 估唔到今個寵物展收穫咁豐盛!
希望兩隻豬從今以後沖涼會覺得係享受, 因為唔使再比我翻來覆去舞唔停😜!
等送貨, 然後試吓效果, 好期待....😆
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
