2017年6月3日星期六

大聲嗌...

琴晚半夜又比達達嚇得慘, 已經深夜全家都瞓晒, 突然又聽到達達大聲嗌...
第一時間仆落床衝去佢網床, 同上次一樣佢都係無郁, 無任何表情, 完全係熟睡狀態; 唔似有抽筋,手脚無縮起, 眼仔緊閉瞓得好熟, 但就不停大聲嗌!

見佢咁嗌真係驚到震晒, 老公即開燈我猛叫達達, 佢睜大惺忪睡眼一臉惘然, 我即刻抱起佢做檢查啦; 全身按壓唔覺佢有痛嘅反應, 手腳都放鬆, 咁為乜大嗌? 唔通又係頭痛? 但佢表情唔似痛啊😲!

比佢嚇到我成個醒晒, 眼瞓都唔敢瞓啦, 放佢上大床瞓喺我身邊, 瞪大對眼觀察!
呢隻豬就好快瞓返喇, 無呼吸急促, 肚仔正常起伏; 我望住佢就有好多猜測, 究竟係咪頭暈頭痛? 呢兩日係有D鼻水, 係鼻塞呼吸唔到? 所以嗌?
我用個鏡仔去做測試有噴霧, 亦無見佢張口呼吸, 鼻塞...應該無, 唯有再觀察!

今朝正常早餐, 達豬食得幾好, 行動表情都正常又唔似有病, 就算我帶佢見醫生, 都唔知點講好, 佢無失平衡無理由去麻醉照腦嘛; 大小便正常, 從邊個方向醫理好???

早午餐都算食得好, 當然佢唔想食有加咗藥嘅肉, 咁都屬正常, 但即使佢係唔想, 都食光光, 咁已經好理想....
琴日又剛用試紙同佢驗咗尿, 一切都正常.....拗爆頭我都唔知佢咁大叫即係點樣呀.....

呢幾晚阿女都有幫佢做reiki, 又唔feel到好差, 同Ka一樣, 都係話頭同胃有D扯住, 但唔似大件事嘛!
雖然阿女話佢感覺達達底子係無波波咁好!
然後老公放工, 再觀察都搵唔到佢有異狀, 問會唔會係發惡夢, 佢好驚呀....
希望係咁簡單啦, 叫自己放鬆先唔好咁緊張, 再留意佢有無異樣, 再作打算喇!