 |
| 相片連結 |
達達呢兩日胃口麻麻哋又猛打乞嗤, 希望只係鼻仔唔舒服無大件事, 呢排都見佢有鼻水, 唔敢比佢游水住, 要set 好個Nebulizer比佢密D聞氣; 估唔到達達咁叻豬, 佢識自己就住, 識對住個出氣口, 大力吸氣😄👍!
已經盡量管理溫差, 長開冷氣, 成日關窗閉戶無新鮮空氣都係死, 但望向出面咁猛陽光, 又點可能唔開冷氣? 依家好似長困喺屋企, 但同佢哋出去又實在無勇氣, 中暑仲死!
兩隻豬已經被培養如溫室小花, 實在唔敢挑戰佢哋, 波波氣管唔好達達又有鼻水, 點敢出去?
早前同波波出去比佢落地, 可能接觸地面濕氣, 成個肚仔出晒紅點真係想死, 皮膚問題唔係大件事, 但足夠煩死你, 見佢猛抓坐立不安, 就覺得自己又好心做錯事!
今次皮膚問題都攪咗好耐, 上次同一徵狀我有帶佢見醫生,今次決定靠自己, 反正唔想又食西藥幫佢!
今次主力全都係外用, 用草本用magic mist, 再加上Ka推薦嘅Dog Plus mineral powder, 總算控制住, 不過皮膚好返, 都有黑色印記!
上次同樣問題我見過一樣結果, 所以今次無擔心, 就比D時間, 等皮膚嘅黑色素自然咁褪去啦!
有時真係好奇怪, 欲速則不達, 愈大壓力愈衰, 反而今次我有意外驚喜!
幾日前波波浸微泡浴, 之後竟然見佢嘅黑皮膚差不多無晒, 我明明每日都有幫佢抹, 但呢種黑色係抹唔到, 點解浸浴可以甩得咁快?
唔怪得話milky spa可以幫到甩毛, 可以幫到黑皮膚, 祇係個原理我唔明白!
時間過得好快, 好快兩隻豬就嚟11歲喇, 年紀大機氣壞, 只可以做吓保養, 希望盡量keep住, 身體機能唔好衰老得太快!
日中都係照紅外線燈, 場效應治療, 艾灸同E-Acu針灸筆, 依家多咗阿女幫佢哋做reiki, 希望幫助更大!
 |
| Link - mp4 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
