 |
| 相片連結 |
距離上次幫兩隻豬浸浴差不多有 10日, 如果keep住一個月浸三次, 可以完全唔用shampoo, milky spa有足夠清潔能力, 簡單咁利用微泡震盪, 浸完吹乾D毛毛, 已經好爽好滑喇; 正常情況下無必要浸得太密, 但如果隔太耐去浸, 我感覺D毛毛會有少少立, 咁就要用shampoo先清洗, 然後再浸微泡浴!
人真係有憜性, 以前達達甩毛, 我真係好勤力比佢浸微泡, 依家就拖得就拖, 畢竟又浸又吹毛都幾辛苦!
早前用咗烘毛機, 又解決咗我好大煩惱, 吹乾毛毛嘅過程大家都唔辛苦😌!
其實多年前我買部milky spa, 老板已經建議可以三隻豬一齊浸浴, 佢哋無皮膚病, 唔怕有感染問題發生; 一齊浸係無問題, 不過我得一雙手, 吹乾毛毛嘅過程就驚冷親啦, 根本無可能!
今次有咗部烘毛機, 美夢變成真, 琴日試比兩隻豬一齊浸spa, 跟住一齊入箱烘毛, 非常討好; 兩隻豬有個伴比較安定, 連波波入咗烘箱, 都爬低合上眼, 好放鬆!
波波都係用咗30分鐘, 無需要加長時間, 兩隻豬仍要中途出來梳鬆毛毛, 手腳嘅毛都係要之後加工!
達達都係要多烘20分鐘, 然後用集風嘴多吹一陣, 兩隻豬好似幾享受柔和嘅暖風, 一邊吹一邊自己瞓覺😊!
我就真係覺得部烘毛機好用, 吹毛唔使我手動, 最好係兩隻豬一齊做, 我慳咗好多時間!
然後, 又好自然諗起豆b, 佢一向沖涼都唔合作, 浸浴成日爬高, 吹毛剪毛又表演軟骨功, 如果今日佢仲喺度, 佢一定都會覺得舒服!
有時, 我感覺好奇怪, 會覺得豆b究竟有無存在過, 係咪夢境? 瞓醒豆b就唔見咗!
有時又會諗同隻豬相處嘅日子, 一點一滴都仲咁真實, 每個情境鮮明好似發生喺琴日, 究竟豆b佢有無走?
傻完清醒後, 我知道豆b依家喺彩虹橋上, 有好多好朋友, 陪住佢一齊生活一齊玩, 一定係最開心!
諗得再多都係無用, 都係照顧好波波達達, 希望保養得好D, 可以相聚更耐時間!
要珍惜相遇嘅緣份, 可以相遇相守, 必定緣份好深!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
