話兩隻豬健康良好, 好似唔太正確, 畢竟有長期病患, 但話佢哋好唔妥, 又未算係症狀好嚴重; 我但求病情可以控制到, 唔要衰退得咁急速, 慢性病就慢慢照顧, 比時間我就好, 不過D濕濕碎小毛病都好折磨, 總係搞唔掂囉😖!
每日都有比manuka honey兩隻豬做保養, 波波係咳少咗, 但偶爾嗰一兩聲都係無停過, 係轉天氣令佢氣管敏感? 咁呢個冬天都唔易過😟!
達達豬食honey好似咁快就食純咗, 初時真係好幫到, 依家又鼻仔濕濕囉, 見佢面仔毛毛都濕到紅咗, 即係鼻水頗多, 咁好唔妥!
拎返樽中藥'養氣'出嚟, 實行我原先計劃咁去做幫助, 諗住食一星期佢鼻水收咗就停服, 咁短時間應該無太大問題喎!
食咗兩日, 幫助唔大, 無以前嘅效果, 上次食兩次已經見明顯效用, 咁快又食純咗?
食到第三日, 佢又有抽筋徵狀前手縮起, 真係嚇死我, 咁達達真係夾唔到呢樽中藥, 我唔會再試, 呢樽藥又廢咗😓!
達達嘅乞嗤同鼻水, 波波嘅咳嗽症狀, 又唔可以話好嚴重, 但都好困擾我, 用咗咁多方法都係唔可以斷尾囉!
還好係兩隻豬仔精神胃口算正常, 波波雖然無做血檢, 但肉眼去判斷情況係唔錯, 毛毛仲厚咗, 感覺狀況無大幅滑落; 好多時都睇到FB群組上嘅毛孩家長互相打氣, 叫唔好太倚重數據, 數值只係參考, 最緊要寶貝食得瞓得起居生活正常!
我好同意佢咁講, 寶貝嘅實際狀況最重要, 不妨撫心自問, 如果自己患上重疾, 自己要生存? 還是要生活?
達達都係有公主病, 不過佢從細對食物都好冷漠, 依家身體唔好更難討好, 日日要望佢心情靚; 心情靚時自己就食得好好, 心情唔好要手餵都怕佢會激動, 不過已經好感恩佢仲肯比我餵, 仲肯吞落肚!
希望最少可以由基本去做好, 著重有正常嘅生活質素, 其他嘅無謂強迫去做, 做咗亦未必係最好, 唔想大家壓力爆煲!
毎日堅持住同佢哋出去行一轉, 除非落雨天氣唔好, 見佢哋出去心情幾好, 達達眼仔睩睩, 波波都反應好好, 依家有狗狗行近佢會大聲吠到好嘈😅!
以往最怕佢呢個麻煩嘅行為, 依家佢再做, 感受完全唔同, 竟然感覺良好😝; 人真係要失去先知道, 原來呢種都係幸福, 起碼有個互動, 依家我再唔會為佢哋一切所謂嘅曳曳行為而動怒, 一件事點去睇, 都係視乎觀點與角度😊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
