 |
| 圖片文章出處 |
好多謝有心人嘅努力, 喺FB上設立咗獸醫由2000年至今曾否被獸管局裁定投訴成立嘅群組 - "獸醫黑名單", 等大家選擇獸醫時有一個參考, 承如版主所講, 無上榜嘅唔代表呢個係好獸醫, 祇係主人無去投訴, 唔係主人唔想投訴, 只係有時舉証有難度, 變咗有冤無路訴!
要投訴一個獸醫要耗費好多時間, 精力, 但主人都唔怕麻煩, 誓要為主子討回公道, 其間一次一次重溫椎心之痛, 都係要獸醫得到應有裁決, 對待生命唔可以輕率!
大家有養毛孩嘅, 或大或小都試過同寶貝求診時受過唔理想嘅對待, 當然你無呢種經歷係好幸福, 祝願大家永遠都唔會遇到, 但時不時網上見到寶貝求醫時遇到嘅經歷, 我會形容係"恐怖"; 大家睇咗唔係話要一面倒盡信, 但個案可以比心中有個譜, 係非常寶貴嘅資訊!
都知喺香港要獸醫入罪真係唔容易, 如果經過研訊, 而裁決專業失當, 咁呢個獸醫仲值唔值得再取信, 大家都心中有數!
可能, 你會覺得每個人都會犯錯, 如果經過一次錯失後會反省, 以後加倍小心, 你認為可以比機會佢做番個好醫生; 又或者你無辦法接受一個醫生有疏忽, 畢竟關乎一條寶貴生命, 諗諗寶貝因為醫生嘅失當行為失去生命, 真係痛入心扉, 呢種錯失係無法追討, 無得彌補!
無論大家點諗,都好多謝有心人努力做咗咁多功夫, 比大家知情權; 版主亦提點咗好多相關知識, 例如醫生係無權唔比毛孩嘅診療紀錄等等....
我睇過列表, 原來我都有睇過榜上有名嘅醫生, 當然, 最後我都認為同我唔夾, 無再去睇喇!
我曾經遇到過有heart獸醫, 好多好多年前, 叻叻嘅主診醫生, 就曾經主動print咗好多頁叻叻嘅病歷紀錄比我, 佢話萬一叻叻半夜要急診, 問唔到佢攞病歷紀錄, 都可以自己準備好!
亦不幸遇到庸醫落藥草率, 令叻叻最終走上不歸路!
有時好懊惱, 有部份有料嘅醫生未必有heart, 會流於斷症草率, 亦有部份有heart嘅又經驗不足, 未必幫得到....
要遇到有料又有heart, 仲要同自己理念夾嘅醫生, 真係好難, 唯有自己做多D功課, 希望減低出錯嘅機率!
節錄一段版主嘅po文:
今次我要介紹既係註冊獸醫實務守則第17.7段 –
「如註冊獸醫管有或管控某動物的醫療記錄，包括(但不限於)臨床筆記、診斷顯像底片及／或記錄，以及／或化驗結果，而該動物的主人或代理人要求註冊獸醫提供該等記錄或當中某個項目的副本，獸醫須及時遵從其要求。儘管有前述規定，獸醫亦可在收取費用，以彌補因遵從該要求而招致或將招致的合理行政及複製成本後，才遵從該要求。」
呢一段清楚列明寵物主人絕對有權要求診所/獸醫提供其寵物的所有醫療記錄！請留意，守則係寫「獸醫須及時遵從其要求」。係必須個須，因此，獸醫係不能拒絕提供，否則就係違反咗守則，大家到時就可以向獸管局作出投訴！仲有醫療記錄係不限於檢驗報告(如驗血報告、X光片等)，係包括埋獸醫既臨床筆記。一份完整既臨床筆記係要詳細記錄獸醫為寵物作出既各種檢查同發現、生理表徵(如心跳、血壓等維生指數)、作出過既醫療行為如開過咩藥(其份量同次數等)以及做左咩手術等等。
大家想知更多資訊, 可以join FB 上獸醫黑名單群組, 版主會定時將資料更新!
https://www.facebook.com/groups/539473136519503/?fref=gc&dti=1495441740690700&hc_location=ufi
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
