 |
| 達達面仔好乾爽🙏 相片連結 |
兩隻豬食咗幾日manuka honey, 達達真係少咗鼻水同乞嚏, 見佢面毛同鼻仔兩旁無再濕漉漉, 真神奇😊; 要睇耐D, 確認效果呢隻蜂蜜係咪真係有特別本事!
波波都咳少咗好多, 只係飲水同早上起身時有咳兩聲, 日間整日都再無咳過, 可能我每日只比一次份量太少, 今日開始比多一次, 再睇效果, 但有目前嘅成果, 我已經好滿意!
每添加新嘅supplement都係從細劑量開始試, 安全D😜!
我一早聽過高濃度嘅manuka honey有醫療效果, 不過當時未有需要, 無在意; 好多謝FB上網主嘅分享, 提醒咗我!
我希望我嘅分享都幫到其他狗狗, 用天然食材治病又得到預期效果, 最好不過!
 |
| 達達無食晒, 好彩波波賞面咋! |
天氣超乾燥, 開咗放濕機仲想用食材幫補, 內外兼顧; 剛見到網上分享椰皇燉蛋白, 我就做比兩隻豬仔潤潤, 抵抗天氣乾燥; 不過我無跟足食譜, 椰皇水太甜狗狗食用好似無咁好, 用咗1:1椰青水溝淡, 祇餘少少清甜味度!
波波較受落, 佢食蛋白最好, 蛋黃比蛋白磷高, 腎仔唔好食蛋白可以吸收到優質蛋白質係最好; 達達對呢個燉品麻麻, 佢鍾意食蛋黃, 咁分開食都好, 最緊要佢肯食, 比適量就好!
雖然天氣乾燥, 但呢種天氣同兩隻豬仔去街街最好, 有陽光但唔太猛, 有風吹住好舒服; 我盡量揀午餐前出去, 因為達達去完街明顯胃口好!
生活平凡咁過最好, 其實我都唔想再庸人自擾, 奉行見招拆招算數😊!
 |
| 波波比以前放鬆, 神經大少有進步😁 |
見到波波情況穩定, 一切算係上咗軌道, 可能佢都無特別唔舒服, 面容比以前詳和討好!
達達脷仔顏色都比以前好, 精神狀態都有進步, 琴日比蛋黃佢食, 唔使餵自己食得好好; 最好笑係波波喺佢身邊行過, 佢惡死到衝前將波波撞開😱, 呢團火好夠力度, 久違了!
兩隻豬似乎健康情況都有改善, 我叫自己盡量放開懷抱!
唔再擔憂兩隻豬嘅長期病點過渡, 但求做好本份, 為佢哋搜尋最適合, 結果係點無人會知道!
睇過一篇文章, 佢話擔心係個詛咒, 我唔想咁做😉!
 |
| 脷仔顏色係有改進到😄 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
