大家見到波波拖住架輪椅唔使擔心, 波波無殘廢!
不過佢有膝關節異位問題, 而我無打算比佢做手術, 事實佢健康情況要麻醉太高危; 呢個關節異位係結構性問題, 情況唔會好轉, 膝蓋骨只會越來偏離窩位, 我要諗吓計, 就算唔考慮治本嘅手術, 都要諗個方法幫吓個仔！
波波下個月13歲喇, 已經係高齡豬仔, 以佢咁蛇呱嘅性格, 即使真係比佢開刀, 要復原都係大問題, 從佢失明後嘅反應, 我會預計佢術後會慘叫得好悽厲!
佢唔似其他狗狗咁tough可以適應得咁好, 而且呢個年紀, 加上健康問題, 我諗獸醫都唔會建議開刀呢個作為喇!
波波仍然可以坐低後自己企起身, 但動作明顯無以前咁靈活, 因為佢要先調較好姿勢; 佢仍可轉圈便便, 但偶然會轉到跌低, 行得唔穩, 因為有時佢祇係用 3隻腳仔, 個力度分佈有問題!
 |
| 明顯左邊身體受力 |
波波兩隻後腳都有膝關節異位, 而右腳比左腳嚴重, 基本上佢膝蓋骨滑出骨窩後, 已經唔可以自動歸位; 勉強步行時會趷跛跛, 明顯重心全傾向左邊, 側晒落一邊長久一定出大問題, 再咁落去左腳都會好快被拖垮, 前手負荷壓力亦大, 按摩時已經感覺到佢左前手個豬展仔有D僵硬, 唔使好耐一定會拖累埋其他部位, 一環接一環累埋條腰仔, 全身關節痛痛可以預計, 我唔想去到咁差先去諗計!
已經每日輪流做住按摩, 艾灸, 照燈, 無針針灸同電磁場治療, 起碼加強血液循環, 希望避免到因軟骨磨擦做成關節炎, 同肌肉勞損嘅問題!
呢種種保養我會盡力而為, 但要幫佢四肢卸力, 都要有個支撐,希望買架輪椅可以幫佢轉圈時, 膝關節無咁受力, 醫生講過轉圈傷害關節係最大!
輪椅只係輔助性質, 唔可以長時間配戴, 主要幫輕佢便便轉圈時嘅力度, 平時仍要佢自己鍛鍊肌肉強化腳仔, 後腿站立運動仍要堅持做㗎, 唔可以全倚賴輪椅變成真係殘廢啦!
打算每日短時間去用, 間替住正常腿部運動, 每節只用15分鐘, 唔想佢傷害韌帶引起痛痛, 又唔可以全靠輪椅變咗隻廢松松!
要有適當活動, 先幫到大腸蠕動, 便便先會無困難; 要keep住肯行, 腳仔要有郁動, 先可以鍛鍊大腿肌肉唔會太快萎縮, 不過個仔失明後真係行少咗, 睇唔到變得好細膽, 唔敢行...惡性循環!
呢個仔, 我都知要佢用輔助器具真係好難, 但我無更好嘅辦法, 真係諗到頭都爆, 希望輪椅可以幫輕吓腳仔受力, 但願比D時間佢會好快習慣!
未見到個輪椅時諗得好簡單, 一廂情願以為祇需比時間佢習慣, 收到後完全係另一回事, 要佢企落去已經好難, 但今次我明白, 真係唔舒服嘛!
真係自己都過到自己嗰關, 叫我望住個仔拖住架輪椅咁辛苦, 我唔會用喇, 呢個輪椅確實唔舒服, 但咁細size根本無得揀; 唔想愛佢變成害佢, 唔會增加佢負擔, 再諗辦法!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
