波波琴晚食完晚餐, 我照例同佢用毛巾抹嘴仔, 點知抹咗隻牙仔出嚟!
超開心, 原來甩牙會咁開心, 哈哈😄....
其實我每日都有清潔、 檢查波波餘下嗰幾隻牙仔, 明顯呢幾日牙仔係乾淨好多, 我深信係善玉菌嘅功效!
關於去除牙石, 我真係用過N咁多種產品, 我喺呢個blog都有提及, 但無論說明、介紹講到點好點好, feedback有狗狗用過有幾成功, 但對我D豬仔係完全無作用, 最後都係要麻醉洗牙😣!
今次見波波個口仔成日郁吓郁吓, 最驚佢牙痛嘛, 今時今日再麻醉洗牙? 好似搵命博啦, 我真係好擔心呀!
咁啱阿女貓貓用善玉菌, 因利成便梗係試吓啦!
我估計其實波波隻牙仔真係好鬆, 但有D牙石黐住又甩唔到出嚟, 佢感覺好唔舒服, 所以就成日口仔郁郁; 而用咗善玉菌後有某D牙石甩咗, 無固定隻牙仔連結住牙肉, 咁經我輕輕一推動口唇, 一下就甩咗喇👏!
我細心咁檢查呢隻牙仔, 牙腳雪白, 非常完好, 週圍只有少少牙石, 其實唔嚴重, 假如係正常口腔, 牙仔兩旁有其他牙齒傍住, 呢隻牙一定唔會鬆脫, 不過依家情況, 當然係甩咗仲好喇!
當年波波洗牙時, 醫生有同我商討dos and don'ts , 究竟餘下嘅牙仔全脫好唔好? 因為剩餘牙仔得返好少數目, 唔脫日後都應該保唔到, 無倚靠嘅牙仔會好快鬆, 最怕係日後蛀牙又會牙痛; 但當時犬齒完好, 一D都唔鬆, 超小型犬嘅下顎骨薄, 強行脫牙扯裂顎骨風險高, 我一聽之下當然唔做!
兩年幾來我好勤力為個仔清潔牙齒, 亦明白牙仔總有一日保唔住, 一定會鬆動, 我祇希望唔好有爛牙, 個仔唔會牙痛; 從呢隻脫落嘅牙仔, 我好安慰見到牙腳完好, 即係無爛牙, 呢個結果我已經好心足!
我從來無保留佢哋牙仔嘅習慣, 但呢隻帶住少少牙石, 牙腳雪白嘅牙仔我會留住, 佢見証住我嘅努力, 承載住我嘅擔心, 錯綜複雜嘅感動!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
