2019年12月9日星期一

又一年啦

每年坐喺同一位置影相, 方便對照吓自己嘅改變😊

又一年啦, 時間過得快如閃電, 好感恩兩隻豬仔又陪住我過生日, 一年復一年🙏!
阿女叫我許個願, 都係祝願個個身體健康無恙, 日子過得平靜, 無太多煩惱增添!

天氣開始凍喇, 已經踏入12月, 凍都好正常, 不過冬天對我兩隻老豬仔有較大影響; 通常都係凍天氣, 心臟有事嘅毛孩會較多意外, 而腎臟有事嘅都要特別注重保暖!

網上睇到呢篇, 即係叫我唔好同佢哋出外, 要注意空氣溫暖, 除咗留守喺屋企我可以人工操控, 出去就一定要食西北風, 點避免😣?

今年我覺得波波特別怕凍, 推斷佢都係年老體弱或者病情加重, 呢個我唔意外, 都明白腎臟受損唔可以逆轉; 自問已經小心照護, 比佢我認為適合嘅醫療, 已經過咗咁多年, 到今日佢仲食得瞓得無咩唔舒服, 我仲想點?!

不過天氣驟凍, 對佢嘅腳仔影響好大, 即使我加倍勤力幫佢做保養, 按摩、質子能量針灸、低頻交變電磁場治療, 再照埋紅外線, 都只可以幫佢舒緩吓肌肉, 完全無助佢移位嘅膝關節!

一早已經預咗佢單一就力喺右腳, 一定會拖垮埋左腳, 會兩隻後腳都難再有正常活動, 事實係無得改變!
都要從新考慮吓用輪椅, 方便佢便便時轉轉轉, 見佢一轉就跌真係好唔掂, 不過大前題係要佢用得舒服, 之前買嘅就唔合用, 太重穿戴亦唔方便!

達達嘛, 有D一言難盡, 感覺時好時壞, 情況難掌控; 要話佢身體變差佢又有正常互動, 老公未返佢享受自己嘅空間唔會嘈, 到大概時間佢就望住大門等放工, 從老公踏入門口佢就開始吠, 一路到老公抱佢上梳化排排坐, 佢把聲先會停頓...
講真, 感覺佢腦退化問題用順勢療法係有改進!

話佢唔肯食無胃口? 佢又唔抗拒手餵, 仲會擘大口等你一羹羹餵入口中!
餵食好簡單, 無所謂嬌縱, 祇要公主肯食肯吞落肚, 奴才一定依從; 總知盡力而為, 做到嘅就盡做, 唔會過度!

前幾日睇咗個forum, 有讀者問醫生有關症狀問題, 醫生解答後, 講咗以下嘅說話, 我會時時刻刻記喺心中!

“雖然我們都希望我們的狗能一直陪伴我們，但是當狗真的年紀大了，我們也得放手，我自己心愛的美國種秋田狗，一直陪伴我們到他快十三歲（平均壽命十一歲），當他走的時候，全家都非常難過，都希望他能陪我們久一些。

然而，我們後來看舊照片及影片時，才真的了解到他最後一年老得很快，身體從一百多磅掉到七十幾磅，眼睛看不清了，後腿沒力，每次站起來都很痛苦，他還是忍痛用力站起來迎接我們回家，直到他走以前還硬撐陪我們在家四周繞一圈，與其說是我們在遛狗，其實是狗以他最後的生命陪我們。

現在想起來，非常不忍，他早就失去年輕的氣勢，早就想離開老舊的身軀，但是他為了我們，一直硬撐著，讓他受盡了軀體的痛苦。如果能重新來過，我會希望他能不要有痛苦的早些回到天堂，雖然我們都希望他能一直陪著我們，但是因為我們愛他，我們真的不願意他為了陪我們而受那麼多的折磨，「放手」是我們面對死亡時必須學習的課程。”

都係轉個話題啦, 生日講呢個題目太凝重, 講返D開心嘅輕鬆輕鬆🤪...
喺等待緊美國嘅新stretch fleece shipped返嚟, 我又買咗兩件衫仔😊!
我好鍾意佢BB衫咁嘅設計, 而最難得係短身, 我可以買大一個碼都唔會過長, 鬆鬆哋唔會壓住D毛毛纏埋一齊, 有多D疏通皮膚嘅位; 當然保暖度唔高, 但日間基本上唔太凍, 屋企仲有control住溫度, 不過無件衫披住又怕真係冷親兩隻豬仔, 老人家唔可以用常理去睇!

依家一早就著BB衫, 中午就裸體喇, 全日著衫皮毛傷害大, 最怕焗到有皮膚病出嚟, 到入夜再著返stretch fleece, 瞓覺要確保唔得冷病兩隻皇帝!

阿女呢, 今年為我親手燉湯補身, 仲燉咗個紅棗桂圓桃膠鮮奶糖水, 佢話養顏滋潤, 而生日禮物係一桶薯條😋, 呢個係我最愛嘅小食, 佢話物輕情重唔好用價值去計!
於我來講, "洗手做羹湯"咁窩心嘅舉動, 相比任何用錢買嘅禮物, 更令我歡喜😍, 心意最寶貴!