 |
| 相片連結 |
感覺精神同身體都好攰, physical方面當然係近來多咗走動, 我好少同一時間幾個方向跑, 但最近時間唔許可, 唔可以由我安排, 就一於照衝, 當然後果係攰啦; 真係同幾年前有分別, 精神體力都唔同晒😴!
時間大神無偏心, 人同動物都一樣咁行, 兩隻豬仔體力衰退時, 我何嘗唔係身不由己步速已減慢?
精神方面嘅攰最難排解, 之前係因為阿女嘅貓貓, 嚇我一驚死好多細胞, 雖然係阿女嘅貓, 但從貓貓兩個月大, 我一直有參與照顧陪住佢哋長大, 兩隻貓b又好痴我, 當然感情非一般啊; 擔心會神經拉緊, 一吓放鬆返原來好攰啊!
今次阿女出門, 我去照顧貓貓比平常吃力, 可能貓貓腸胃都仲未好返晒, 胃口麻麻, 一日三餐都要手餵, 用多咗時間, 總之身體抱恙就係扭計啦!
因為出去嘅時間長咗, 當然照顧兩隻豬仔相對無咁多時間, 想去街街好難, 唯有留喺屋企, 波波可以唔用輔助帶自己行一陣間.
呢個仔已經習慣依賴條步行輔助帶, 外出唔拖帶佢會無信心行, 咁都好嘅, 我都想減輕佢膝蓋負擔, 唔想佢受傷啦!
反正呢兩日突然又凍咗咁多, 對兩隻高齡長期病患係大挑戰, 都係唔好出去住喇, 天氣轉變佢哋應該未習慣!
已經做好環境管理, 溫度濕度調好, 再著返件衫, 年紀大咗的確係會瞓多咗, 瞓著體溫會偏低血液循環變慢, 好怕懾親又病喇, 小心為上策!
滿滿兩大櫃桶嘅衫, 但搵件著都好艱難, 以前唔識點為狗狗揀衫, 著重睇款式又鍾意影相嘛, 其實年紀細時實質需要唔大; 到咗今日年紀大, 血液循環差真係有需要著衫, 尤其波波腎陽虛, 佢會凍到震晒; 幸好自己經驗多咗, 揀衫首要顧及舒服啦, 波波一直最憎著衫, 依家唔著唔得, 都唔想佢硬晒軚!
然後...好難過得悉朋友Am嘅小狗幾日前上咗彩虹橋, Am一直有同我講及狗狗身體狀況, 佢嘅離開我無意外, Am都應該感恩狗狗已從病體釋放; 但無論幾有心理準備, 對於生離死別嘅傷痛都唔會少咗, 更何況 4個幾月前佢先送別一隻狗狗, 幾個月間噩夢又重來....
已經有兩個朋友, 幾個月間送別兩隻狗狗, 一吓間屋企靜晒, 屋企變得好大, 完全被空虛攏罩, 呢種空洞嘅感覺超可怕!
安慰嘅說話作用唔大, 呢種傷痛需要時間沉澱, 整理好思緒再出發, 與Am互勉啦!
 |
| Rest in Peace, "C" |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
