2019年12月28日星期六

愛心輪椅 (w/video)

波波嘅愛心輪椅終於做好, 現階段佢仍在學習操控, 行唔到直線又唔識轉彎, 橫衝直撞亂晒坑; 但佢肯坐落去唔抗拒, 已經係好嘅開始, 熟習係需要時間!

屋企空間唔大, 碰撞在所難免, 其實波波身長由頭到尾都無12吋, 細過一塊地墊, 個輪椅都一定唔會巨大, 不過佢睇唔到就有一定困難, 唔識避開佢又細膽, 一有碰撞就嚇到嚶嚶叫, 呢一切要靠佢自我摸索練習喇!

我哋為波波做呢個輪椅都有D困難, 唔係隨便砌埋咁簡單, 難在一改再改呎吋, 稍微有出入都驚佢唔舒服, 萬一個仔抗拒唔肯坐就麻煩; 畫圖唔同實踐, 未見成品見唔到真實呎吋, 憑空想像又無經驗, 要改動就係最煩!

根據呢個做參考

做得太矮怕波波會頂住頭仔, 太高又驚個仔駕馭力有不逮, 太長帶動有難度, 但又唔可以過短, 理想係稍向前伸展, 因為波波睇唔到, 想有多個保護, 作用有如防撞環!

老公唔係專業, 無適當工具又比較難搞, 盲摸摸都去試做, 只因之前買嘅動物輪椅係金屬, 波波難以帶動咁重嘅物料佢唔肯行, 為咗個仔親手去做係必然選擇!
未做之前覺得難度唔高, 最緊要買到用料, 但原來最難係就個呎吋!
最終個結構都做好, 老公負責嗰部份完結, 座位嗰part就輪到我去衝線!

我就扮做慈母手中線, 拎出衣車密密縫😅, 呢D設計咁繁複, 我真係老鼠拉龜, 望住個摩打唔知點推動!
落足心機, 大汗疊細汗咁去車縫, 但做好後放波波落去試坐, 佢不停咿咿哦哦要立刻彈出😓...
可能我唔識立體剪裁, 做得唔好令佢覺得唔舒服, 但花咗咁多心機將車架做好, 唔想就咁算數!

個腦不停轉, 靈機一閃, 突然諗起條步行輔助帶, 波波並唔抗拒都肯用, 即管試試改裝, 希望合用; 要多謝A送比我嘅前肢輔助帶, 令到難題有機會解決, 如有神助頓變輕鬆!

波波前手ok, A送比我呢條前肢輔助帶, 我都係放埋備用, 無諗過咁啱timing會click中, 今次用來改裝放落個輪椅, 天衣無縫!
雖然都又拆又縫, 左改右改好繁複, 波波係男仔, 唔可以包住佢嘅尿尿位, 一定要改動, 但用得著而波波唔抗拒就大成功啦!

video

之前買嘅輪椅只有後輪, 因為波波前肢正常有力, 我以為兩輪已合用; 但經過有經驗嘅朋友指點, 叫我唔好比波波全靠前手拖動, 唔比support前臂太勞累, 輪椅都係要用四輪!

雖然我唔會長時間放波波上輪椅(佢都唔會咁被動😜), 主要係早晚餐後要利用, 方便佢poo poo時不停轉動; 用咗兩日, 個仔轉轉轉便便時都起到作用, 今次呢個制作尚算有少少成功🙏👏！

無可否認依家日常都可以多D活動, 短時間運用嚟行吓, 唔使坐定唔郁; 但要避免好心做壞事, 解決到一方面嘅問題時又變咗手痛!
每次祇比佢用幾分鐘當做運動, 佢未識借力去拉動, 未習慣都係一個有負擔嘅體力勞動, 佢一有表示唔坐就要立刻停頓; 每次用完我會即時幫佢按摩, 日常物理治療全出動, 最緊要唔好搞到佢肌肉酸痛!