養咗狗狗有幾十年, 今時今日養到我服晒, 往後唔敢再養喇; 我話過" In my life, My Dog is NOT an option, He is a NECESSITY", 無咗狗狗作伴, 我嘅人生一定有所欠缺, 但我實在無再照顧好一隻狗狗嘅勇氣!
經驗越多, 越容易察覺狗狗嘅任何輕微變化, 當然希望有病時能及早延醫診治; 日子過得越耐越多領悟, 有好多病患根本無得阻止, 任你花再多心力, 想扭轉頹勢都係唔可以!
年紀大機器壞, 生命自有週期, 每個個體都要面對不同健康issue, 無得逆天行事; 照顧得好狗狗會較舒服, 生活質素會較高, 但對自然生理定率, 年老器官衰退都係要接受, 做得再好, 時間要到一切無得推遲, 無奈又氣餒!
其實我睇得通, 亦努力情緒操控, 比以前放鬆, 但對住自己心愛嘅寶貝一日比一日年老, 身體狀況越來越衰弱, 又點可能無動於衷?
我雖然接受到, 盡力去做得好, 但見到波波已經睇唔到, 依家自己行唔到, 仲企都企得比之前辛苦, 個心極痛!
成日強調生活質素, 睇唔見行唔到嘅生活, 仲有無幸福?
 |
每日安慰自己波波仍好, 佢胃口仲好好, 食得瞓得痾得都好; 佢嘅缺憾我可以幫到, 佢仍過緊正常生活, 只係要外來輔助, 唔係生存價值全無, 我拖住帶佢仲行到, 睇唔到佢仲聽到, 感覺比正常敏感度更高...
我硬要自己自我感覺良好!
 |
| 企都要就住, 兩隻後腳膝關節移位日益嚴重 |
話我接受到? 但間中又好煎熬! 話接受唔到? 我又好似一早預料到, 一直行緊預知嘅路!
可能波波一直係我心頭肉, 見到佢失去視力同正常行動, 自動心痛!
達達反而較好, 佢可以正常生活, 而且佢性格較獨立, 見到你喺附近就好, 佢需要陪伴但唔要抱抱; 從來覺得達達男仔頭性格, 直接灑脫硬淨, 同波波相反, 波波依家勁黐身成日都要抱!
今日無端端發一大輪嘮叨, 可能聽到太多狗狗唔太好, 希望係天氣唔好暫時影響到, 太多衝擊我未接受到, 比自己情緒一個排毒開口, 呻吓都係正路😜!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
