 |
| 相片連結 |
日子悄悄咁過, 又個多星期無update個blog, 一來自己又病咗, 二來真係越來越懶惰; 生活如常無咩好講, 兩隻豬仔情況無明顯差咗, 亦無突破!
覺得自己無咗心中一團火, 唔似以前見到佢哋有咩唔妥, 即刻東奔西跑瘋狂上網, 務求立刻搵出解決方案, 依家真係冷靜好多!
睇咗太多其他毛孩健康個案, 益發感覺無奈, 事實唔係單憑努力, 鍥而不捨就可以得到預其效果, 我已經調整好心態, 慶幸仲有空間去幫, 但再無不切實際嘅期望!
祇期盼兩隻寶貝能夠穩定緩慢咁行落去, 唔會遇到驚濤駭浪!
波波身體健康目前算唔錯, 食得瞓得痾得一切尚可, 主要都係靠順勢療劑幫助, 仲有中西藥補健品輔助, 無明顯症狀見到, 我唔再庸人自擾預早擔心咁多!
但佢腳仔情況正慢慢走下坡, 膝關節移位令小腿骨旋轉, 如果強行用隻腳佢可能會痛, 好自然轉移重心, 力度放喺身體其他地方, 我都知道咁唔好, 但呢個年紀呢個身體狀況, 唔會考慮手術, 我唯有堅持做保養, 希望喺其他方面幫到更多啦!
無放棄一切有關物理治療按摩, 我諗呢方面我算做得尚好, 但願可以keep住無關節炎, 無肌肉萎縮情況, 雖然我感覺佢大腿肌肉係差咗, 但最緊要無痛囉!
目前用步行輔助帶佢都算仲行得到, 但要解決嘅問題仍好多, 慢慢去諗解決方法, 唔再心急一步步希望做得更多!
達達豬嘛, 胃口係最難捉摸, 真係時好時壞無晒符, 除此之外無見到有明顯退步; 有話不進則退, 咁無退係咪已經算好? 阿Q精神又上腦!
時刻keep住往好處想, 唔要咁多負能量, 亦祗有咁往後行先有力量, 每個生命上天早有定案, 兵來將擋到時自有方向!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
