讀後感

多謝波波有返嚟探媽媽

聽歌同閱讀, 我都會選擇喺夜深時間, 寂靜嘅夜晚精神較集中, 心靜亦更能夠領悟內容!
第一本書'牠不在, 但都懂'已經睇完, 我自己感受更深嘅反而係開頭嘅一篇篇序文, 而書嘅內容, 可能同現實居住環境有距離, 觸動唔大, 我祇當係一個個獨立案例去閱讀, 抱有宗旨, "只要信, 不要問" !

書中個案無感同身受嘅感覺, 外國環境貼近大自然, 好似好容易接觸到大鳥, 鷹, 蝴蝶, 更甚嘅可以見到狐狸, 鱷魚, 兔仔, 松鼠等等, 比佢哋好立體嘅靈魂訊息悟感; 而我哋聽得最多, 最多人提及都只係見到飛蛾吧; 不過睇完後都會感覺好安心, 重點係相信心愛嘅毛孩, 佢哋真係有返嚟陪伴左右, 當再感覺到有異狀, 唔會再懷疑係自己神經錯亂, 唔會再疑幻疑真!

依家, 當我聽到波波吠, 或者有特殊感覺同其他聲音, 我會立時安靜落嚟, 唔會再兩頭張望去搵, 反而會合上眼靜靜去感受; 呢本書有加強我信念, 相信離開嘅寶貝真係會返嚟, 有咗呢個信念就好暖心, 呢本書有達成佢嘅功能!

琴晚, 開始睇第二本獸醫張婉柔嘅書, 只係睇咗廿幾頁, 睇到呢篇內容, 我真係好驚訝, 眼淚就不受控制咁落下!
點解內容同波波臨終時, 我請好朋友為我傳心, 對話內容咁接近? 波波都曽經講過類似嘅說話.....

我諗, 呢本書應該觸動更大,畢竟外國嘅翻譯書同我哋嘅經歷有一啲距離, 而呢本書睇到呢度, 我已經喊咗幾次喇! 

當佢提及照顧毛孩最後階段嘅感受, 自己好努力做咗好多, 但又唔確定所做嘅係咪毛孩所要嘅, 但又唔敢唔做, 反反覆覆直至意志力崩潰, 然後只好同佢講, "你若很不舒服, 你可以離開沒關係"....

波波離開後, 我比過往失去毛孩有更深更痛嘅感受, 我明白天下無不散嘅緣分, 今世唔可以再相守只可以寄望來生; 我一直叫自己要放開, 有時因為某點觸動而落淚, 我都好似有罪惡感, 覺得唔應該不停來回咁喊咁傷心; 但呢本書, 解開咗我心結, 我只係仍帶傷口, 未完全結痂所以仲有痛嘅感受!
太多太多感同身受嘅描述, 我要慢慢睇慢慢消化慢慢諗!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！