今日嘅文純粹係比自己呻吓 :p
日日都咁忙, 分身不暇, 以前有工人姐姐幫輕家頭細務, 我只負責3隻豬仔, 好多時間; 有兩個人分擔, 好輕鬆無困難, 工人姐姐只負責清潔打掃煮兩餐, 仲有時間午睡玩電話, 我又有上網、 寫blog時間!
但要一個人完全負責晒, 我好唔習慣, 雖然唔係超級困難, 但濕濕碎碎嘅功夫, 要轉來轉去, 好似無晒時間; 一早起身蒸肉餵D豬仔我已經習慣, 咁耐以來我從無偷懶, 不過以前佢哋食完我可以齊齊入房再瞓一陣間, 依家就好難!
依家只放3隻豬仔入房瞓覺, 我自己就快快食個早餐, 要開始一日工作喇 :(
每日要吸塵兩次, 唔想影響D豬仔呼吸困難, 佢哋氣管差, 塵埃引發氣喘就慘; 蒸地就無可能每日做喇, 無辦法有咁多時間, 仲要留力唔可以做到自己散, 好怕挨病仲慘, 見過鬼都怕黑喇!
我雖然無潔癖, 但都要屋企齊齊整整, 容忍唔到亂晒坑; 變相比工人做得更徹底, 以前叫自己半合上眼, 依家自己做就要過到自己嗰關!
跟住洗衫, 收衫熨衫, 每日輪住做吓, 都未攪掂又到3隻豬午餐時間, 要放低手上工作準備比佢哋食晏!
我唔想忙就唔同佢哋玩, 又要幫佢哋做日常護理, 真係週身唔得閒, 密密手做過唔停, 仲要落超市買餸煮飯!
不過我都唔會日日煮喇, 攰到死出去食較簡單!
照顧完佢哋食晚餐, 先有少少空檔時間, 坐低上網覆吓Email, 回吓電話, 咁忙講出嚟都無人信啦, 人哋咪一樣咁過日子嘛!
決定再請番個工人姐姐, 從上次病中就體會到, 無人幫手真係好慘; 呢3隻豬一定要好好照顧, 尤其豆b近日身體比我壓力好大, 時刻要監察住唔比佢激動真係好困難, 萬一自己挨病咁真係死火喇!
經agent請個姐姐, 可惜我真係無工人運, 要請個人都咁麻煩!
嘗試請個有出國經驗啦, 怕咗又話homesick嘛; 今次搵咗個星加坡6年經驗, 應該無咁差卦; 點知等咗個幾月, 話舊僱主同佢再續約, 唔嚟喇!
唉...真係暈, 又要再搵再等, 好難碰到有合適人選, 依家工人都好揀人, 有僱主stay in嘅, 都唔想諗!
望唔到黑洞嘅盡頭, 咁嘅生涯仲有幾耐要守呀?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
