今朝6點幾, 又聽到波波發出作嘔嘅聲音, 即刻跳落床睇佢; 但床仔見唔到嘔吐物, 只係見佢心口毛有D白色黏液, 類似痰嘅物體!
抱佢上我床觀察住佢, 見佢猛咁舔脷, 神情有不安, 但我check唔到邊度出問題!
佢係反胃? 係胃有問題? 但無嘢嘔出嚟!
係氣管問題? 因為見到心口毛黐住似痰嘅物體!
又猛咁舔脷仔, 咁會係口腔有問題?
到底係胃、氣管、口腔還是其他問題?
呢個仔, 總係要我無時安寧, 我都真係唔識點先可以湊得好呢個仔:(
8點早餐時間, 我去準備佢哋嘅早餐, 心裏面盤算緊, 波波我應唔應該餵?
放3隻豬出嚟, 做晒例行工事, 見波波大小便正常, 個心略感安慰; 佢亦對我準備早餐呢個行動有反應, 會吠; 咁情況令我稍安樂, 最怕佢連食都無興趣, 咁就大問題!
決定比佢食少少啦, 開樽雞肉baby food加飯, 咁配搭較易消化, 又出動呢個殺手鐧試探!
波波胃口正常, 將早餐食曬, 食完抱返佢上床, 佢可以安靜瞓覺!
正常嚟講, 食得、痾得、瞓得應該問題唔大, 但當然都係唔放心, 持續觀察!
10點餵佢食一次slippery elm, 因為無論佢係反胃作嘔, 氣管或係囗腔問題, 呢隻草藥都啱, 而波波食呢隻藥一向有效, 不妨試吓!
整個上午都算正常, 午餐食得好快, 會呱呱叫催我開餐, 希望係小事啦; 如果咁帶佢見醫生, 又好似小事化大, 醫生又會叫我放鬆, 自己搵醫生睇吓情緒喇, 個個醫生都知我係緊張大師啦!
點去拿捏幾時要見醫生, 都係一個高深嘅學問啊!
其實我好矛盾, 好驚會將病情拖慢, 如果延醫診治就慘; 但真係睇過太多例子, 比醫生左驗右驗小事變大, 引發好多後遺症咁仲慘!
好嘅獸醫係唔會隨時standby, 係100%無得插入去排, 如果點子兵兵咁去撞,隨便搵個睇, 我真係怕越攪越彎, 香港嘅獸醫實在令我無晒信心喇!
呢個群組分享好多真實個案, 搵獸醫真係要小心選擇!
獸醫報料大聯盟:
https://www.facebook.com/groups/1495441740690700/
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
