我説話無講得太滿, 我只係話波波無抽筋徴狀, 希望永遠唔會遇到, 我咁講都有錯? 老天咁都要罸我?
琴晩算係早瞓咗, 十一點半就上床, 家務繁忙仲要照顧呢3隻豬仔, 真係好攰, 我好快瞓著!
半夜一點多, 突然就聽到圍欄床度有波波發出嘅聲音, 以為佢要尿尿, 爬起身抱佢出厠板, 就見到佢手腳不自主咁彈跳!
成個人即刻清醒曬, 望住佢行到手腳不協調, 即刻將佢抱起, 佢縮起前手, 驚恐表情出現!
我抱住佢感覺佢全身僵硬, 眼仔瞪大口震震咁, 我知佢都中招!
唉! 我用心照顧3隻豬, 從無自滿無輕佻, 點解咁都要罸我面對3隻豬都要有抽筋, 一個都唔少?
我好小心觀察波波, 感覺佢同豆b有唔同, 佢情況同達達較接近, 都係發生喺睡夢中, 面部表情驚恐, 縮起前手唔正常咁走動!
即刻餵佢順勢抽筋藥, 跟住同佢按摩手腳, 可能呢個仔生性一向緊張, 佢唔似兩個女咁快放鬆; 見佢用條脷仔係咁舔, 無所適從!
我就抱住佢一直按摩叫佢唔使驚, 要放鬆!
波波完全回復正常都過咗半個鐘, 其實食咗藥佢手腳已經無繃緊, 係精神仲未恢復, 佢緊張嘅性格令佢返到正常狀態嘅時間拖長!
一隻一隻咁比抽筋進攻, 病發嘅情景我又最驚面對呢種, 每次見到我都手騰脚震, 即使之前面對過有晒經驗, 一樣咁騰!
琴晚驚到拎住樽藥都唔識打開, 要叫醒老公救命 :'(
比個寶貝仔嚇一驚, 兩公婆都唔敢瞓, 成晚眼光光真攞命!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
