 |
| 相片連結 |
其實都唔係完全無出去嘅, 只係比之前少, 一來呢段日子有太多改變, 我一時間難以適應, 二來真係天氣太悶熱!
今日天氣清涼, 老公又放假, 就決定帶3隻豬出去行一轉; 不過我自己準備一切, 有少少忙亂, 帶齊所須用品, 竟然唔記得帶一樣嘢....嗰樣係最重要!
同3隻豬行遠少少, 地點會較少人煙, 等波波唔使咁緊張, 少咗出去佢一定膽怯; 到咗目的地, 老公叫我放佢哋落地, 我先發覺無帶拖帶出嚟 :(
老公話係天橋上面地點安全, 比佢哋行吓都無緊要, 但我就死都堅持無拖住唔會安全; 我呢個人已經係杞人憂天, 仲睇埋咁多負面新聞, 一吓間個腦湧出九十幾個可怕畫面!
都無所謂啦, 出嚟當做吓熱身, 習慣番外面嘅環境先, 循序漸進先會有好表現!
3隻豬仔出過街有如打咗場仗, 雖然無落地行過, 但精神亢奮後顯得好攰, 食過晚餐就各自上咗自己床仔, 仲快瞓著添!
一直到我哋食完晚飯, 習慣係每晚我帶波波返房瞓大床, 豆b就瞓自己床仔, 我會同佢哋傾吓偈; 達達就陪爸爸, 陪老公坐梳化電視齊齊睇!
今晚對孖b入房即刻喺床瞓低, 仲好快熟睡, 而達達, 都係陪老公坐梳化, 但佢都顧住瞓覺唔同老公傾偈喇!
突然...老公叫我, 話死喇達達做咩呀?
佢咁一叫就嚇到我個心扑扑跳, 即刻衝出廳睇睇,只見達達睡眼惺忪表情好茫然!
我問老公究竟見到佢係點, 佢話達達瞓到反晒肚脚仔向天, 撐手撐脚佢已前從未見, 唔知咁即係點!
真係比佢激死, 咁明顯達達係瞓得舒服伸懶腰啦, 3隻豬仔接連出現疑似抽筋, 攪到我兩公婆都變成驚弓之鳥 😅
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
