豆b仍然無胃口, 情況依舊, 確係擔心!
唔再拖時間, 雖然萬般唔願意帶佢去獸醫診所左驗右驗, 但唔做檢查又點搵原因?
星期六傍晚帶佢去求診, 仍然向Dr Hsiang求救, 一向信任Dr Hsiang為佢哋抽血極溫柔, 由佢抽血我無咁擔心; 如果拖到情況嚴重又碰啱Dr無時間接診, 咁要亂碰亂撞去搵醫生, 攪到豆b半生不死我實內疚!
同Dr講清楚豆b呢幾日嘅情況, 初步聽心肺呼吸無問題, 心跳正常無雜音, 口腔檢查過無腫瘤, 亦唔似有牙齦炎影響佢胃口, 決定先驗個全血, 再一步步去探究!
等待結果每每最難受, 我不自覺緊張到渾身發滾, 終於等到個result, 但報告內容我真係唔想接受!
豆b有輕度貧血(半年前驗血時數據係好靚㗎), 而BUN亦頗高, 呢個係最關鍵嘅原因, 令到佢無曬胃口, 初步反映問題係有關腎功能; 一聽到可能係早期腎衰竭, 我好似跌咗落冰窰!
為咗有多D數據支持斷診, Dr Hsiang建議再加驗離子檢查, 保險D做埋胰臓炎測試, 再加上XRay, 逐歩去搵原因啦!
帶得豆b去求診, 衹要係對佢無傷害, 有需要嘅檢查我一定配合; 但都提醒請醫生一定要小心, 如果豆b有反抗就唔好勉強進行!
總算有個好消息啦, 幾個驗測都無事, 咁個心就開始定D喇; 照XRay係想睇睇各器官嘅大小形狀有無偏差, 排除有無腫瘤嘅可能!
XRay顯示豆b嘅肺好清, 更意外係見唔到氣管收窄, 不過都係有D扭曲咁啦; 心臓就偏大, 但Dr量度過size仍可接受; 膀胱無晶石, 髖關節好靚, 但最差嘅, 就係由頸椎到腰椎都好多骨質增生, 係好多骨刺呀 :(
豆b今次問題都好複雜, 有可能前段時間真係同頸痛有關, 食咗順勢療劑解決咗頸痛問題, 就浮現咗真正嘅問題出嚟喇!
面對咁辣手嘅問題我真係難招架, 抱住豆b離開診所好似渾渾噩噩咁, 攪到上的士暈車浪啦, 又頭暈又作嘔好辛苦啊 :(
返到屋企第一時間搵老友分擔, 同A, Mi商量往後要點做先啱?
多謝老友嘅分析, 一篇篇有關嘅文章如雪片飛來, 解我疑難!
其中有文章我自己都曾經轉貼過啦, 但心一亂就個腦閉塞晒! 雖然驗血直指向豆b似有初步腎衰竭, 但同樣亦有其他可能, 暫時我要定一定神, 要搵多D數據去支持確診!
先冷靜落嚟, 唔好自己先嚇親, 第一步從飲食著手減低蛋白質, 2星期後再覆診, 睇睇會唔會搵到確實嘅病因啦!
http://m.blog.sina.com.tw/53412/article.php?pbgid=53412&entryid=584388
http://m.blog.sina.com.tw/53412/article.php?pbgid=53412&entryid=586702
http://m.blog.sina.com.tw/53412/article.php?pbgid=53412&entryid=591365
http://m.blog.sina.com.tw/53412/article.php?pbgid=53412&entryid=595326
最壞嘅打算咪最多同豆b長期抗戰, 我一定會為佢揀選適當嘅治療, 生老病死係自然定律, 只係有快有慢, 邊個行先!
有過心痛, 徬徨, 琴晚完全失眠, 但今日仍同A去行寵物展 :')
有諗過唔去, 無心情shopping, 但一早睇過今日嘅節目表, 有醫生主講另類療法, 我想喺呢方面吸收多D知識呀!
老公已經一早攞咗假, 佢話會睇住3隻豬啦, 亦鼓勵我出去行吓!
乖乖準時同A去搵個位置坐低, 點知等呀等, 等到過晒時間都未開始, 一問之下, 竟然話取消咗啦!
又無公佈, 累我哋等到呆吓呆吓, 貼張告示都好卦!
不過都算有收穫嘅, 會場推廣假買咗盒黑酵母, 仲訂咗一箱日本制造嘅尿墊, 現場測試效果, 睇住佢倒水落去, 好快吸晒, 仲好乾爽呀!
(後記: 用咗一段時間發覺有缺點, 會過底嘅, no good啦)
可能琴晚瞓得差, 今日狀態麻麻, 行完個展覽攰到我CC吓!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
