 |
| 今日精神好多喇 |
努力照顧豆b, 呢排佢胃口唔好, 無心機食, 就唯有慢慢手餵, 希望佢肯食多D啦!
每朝早都要做多D, 要將食物打成茸, 如果佢自己唔肯食, 就要強行去泵喇, 唔食嘢邊有氣力?
呢隻豬又特別怕凍, 咁落去一定影響佢自身嘅保暖能力啦!
豆b要減肉加菜, 食得少又驚佢餓, 就加上南瓜同一小匙白米飯, 咁會飽D; A買咗紫甘筍比3隻豬, 今日又加咗D落去, 雖然係少咗肉, 但營養都應該OK, 目前最緊要係飲食調較, 等佢BUN下降, 有返食慾緊要D!
日日好勤力做功課, 要清楚所謂嘅腎衰竭係乜事, 唔清唔楚比呢個病名嚇親好不智!
雖然一開始係騰雞又緊張, 但定返落黎都仲有番D理智嘅!
睇多咗個心定返好多, 主要數據支持有腎病嘅驗血報告, crea 係0.7mg/dL, 其實好正常, 離子檢測又無異狀, 只係輕度貧血同BUN係高到69mg/dL有D離譜, 但唔使咁驚青囉, 即使真係有腎病, 應該都係好初期, 就等下次覆診再驚都未遲!
當然佢腎功能都係弱, 或者要考慮要加番補腎嘅supperment做support喇!
呢兩日調較過飲食, 豆b明顯有改善, 已經肯自己進食, 仲好快食清光, 睇見佢有進步我稍感安樂!
呢兩日睇多咗資料, 其實得益唔少, 3隻豬年紀漸大, 其實係需要一D健康指標, 又無可能密密咁同佢哋驗血, 咁最方便都係喺屋企同佢哋驗尿!
網上提及通常驗血出問題都已經係出事好耐, 咁將驗尿設為第一防線係有必要!
其實諗到要驗尿係A提醒我, 當晚睇完醫生, 佢就叫我要同豆b驗尿!
香港對動物保健同台灣差好遠, 台灣的確對動物較友善, 就睇容許入袋搭捷運就可見!
點解突然提及台灣? 皆因我猛搵動物試紙驗尿, 就搵到台灣較普及, 如果驗一般PH值或糖尿, 拍賣網都見; 但我想要驗腎病嘅指標, 就屬專門D, 不過仍係有藥品公司出售, 相反香港嘛, 咩都唔見!
Mi真係好幫手, 好夠朋友, 即刻托咗佢台灣朋友幫我搵, 又話下星期佢都會去台灣, 會親身走一轉睇睇邊度有出售!
聽到佢咁上心我好感動, 好多謝佢無條件嘅實質幫助, 實在多謝呢個好朋友!
當有事發生, 自己會變咗無腦無心, 好多淺而易見嘅理論, 平日可以朗朗上口, 但事到臨頭, 朋友嘅一個提點都好重要, 多謝A嘅提點!
當然, 大家一句問候, 一聲加油, 都銘記在心!
多謝一班好朋友, 喺豆b呢件事上比我精神支持, 尤其係Mi, 一直係我3隻豬嘅守護天使!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
