 |
| 相片連結 |
豆b始終都係胃口唔好, 之前拎起過碗遞埋去佢都會食, 依家直頭走咗去, 咁落去真係好驚, 唔食嘢邊有氣力去打仗啊!
唔肯進食係好大問題, 唯有一啖啖用匙羹餵, 實行force feed啦, 衹要佢肯呑下, 都叫做有嘢到肚, 萬一體重減輕就好煩, 有病嘅貓狗瘦咗一定唔係好事嘛!
好彩佢仲肯吞又無嘔, 但咁都唔係辦法!
Dr. Hsiang叫咗兩星期後返去覆診, 依家只過咗一週, 理論上減咗肉BUN應該會回落, 漸漸有返胃口, 但豆b無照常規行!
仲要等一週先返去覆診, 我就越等越擔心, 想提早去覆診, 無奈Dr. Hsiang放假離港, 咁乾等好磨人; 決定帶豆b睇Dr. Yeh, 攞過second opinion, 星期一睇吓Dr. Yeh點講, 再同Dr. Hsiang研究!
仍然做住大小便體温觀察, 都仲係正常嘅, 點解每次佢哋有病都好似搵唔到確實嘅原因?!
今日天氣唔錯, 中午有太陽, 決定帶3隻豬出去行吓, 咁悶喺屋企左諗右諗, 不如出去透吓氣放寬心啦!
無比佢哋落地行, 再無剩餘氣力顧及其他, 萬一唔好彩惹埋牛蜱熱就慘喇; 雖然唔落地, 但出去仍做足準備, 車仔噴晒bio-care, 而佢哋個身就噴Ricochet Spray啦, 唉, 唔好再惹麻煩喇!
出街波波例牌吠爆, 達達就縮埋, 太少出去公主又心理病發, 驚驚啊!
豆b明顯病樣啦, 無往常咁活躍喇, 眼仔都唔睜大, 唉!
行咗唔夠一個鐘, 叫做曬過吓太陽, 夠鐘返屋企食晚餐喇!
波波達達見開餐巴巴閉嘈嘈閉啦, 好奇怪, 今次豆b都叫埋, 仲肯自動開餐, 竟然食光晒!
係咩原因唔考究喇, 但願唔係曇花一現, 聽日都會有胃口啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
