波波食咗新配方嘅順勢療劑醫蛋白尿, 已經有3星期, 今日同佢驗早晨第一次嘅尿尿, 好失望都係無進展; PH值同尿濃縮度都唔理想, 腎功能好似向下調 :(
任我點做, 呢對twins嘅蛋白尿都好似攪唔掂, 有D感覺天旋地轉, 我已經唔識接招!
呢兩日波波胃口都唔好, 每餐進食都要氹, 雖然有食晒, 但我好擔心; 想當日豆b都係咁, 如果再加埋波波, 我點算啊? 唔敢想像可以點往後行!
阿女叫我咪一開始就往咁壞嘅方向諗, 不過同胎基因接近, 有相同病狀都有可能, 反正已經有經驗, 盡力照顧已經盡咗責任; 如果佢哋嘅命要係咁, 唔可以健康長壽, 但有愛鍚佢嘅父母, 盡心照顧已經好幸運, 係有條件限制下盡能力照顧就無遺憾, 世間上做一件對嘅事, 都唔一定有完美嘅結果, 叫我唔好諗!
阿女話只要問心無愧就好, 我哋嘅角色係一段旅程嘅守護者, 照顧佢哋喺人間嘅呢段旅程, 到站嘅時候, 都係要落車喇!
越聽越傷心, 道理我明白, 但接受好難 :'(
豆b呢兩日又古古怪怪, 唔鍾意布緯療法, 要用手餵, 見佢食得好似好慘, 同之前飛撲過嚟食雪糕好大分別啊, 幸好氹住都肯自己食肉飲湯, 有病要有好胃口真係難; 好彩今朝又開開心心食布緯雪糕喇!
心情已經差, 今日仲睇到Dr. Dobias呢個post, 更家唔開心啦; 我一直都有懷疑, 兩隻豬係咪之前因痛症食西藥攪到個腎咁壞, 其實都唔係全無根據啦!
豆b食藥期間有瘤腫, 波波就肝酵素急升, 佢哋係食同樣嘅藥, 對身體做成長遠壞反應, 我覺得可能性極大!
達達之前後盤搖擺, Dr. Tint係開vit B同血液循環藥, 無食過呢種NSAID's藥, 所以保住無蛋白尿喇!
https://www.facebook.com/drpeterdobias/posts/10154068357652730
波波同豆b去睇醫生嘅時候, 我再三問過藥物會唔會傷肝腎, 答案好肯定話唔怕!
可能我呢兩隻豬對西藥過敏啦,帶去睇專科都攪到咁, 到咗今日我做咩都補救唔到, 係我嘅責任, 點解我唔先瞭解多D呢種藥物, 對獸醫完全信任?
 |
| 睇埋呢個comment真係有共鳴 :'( |
