記得半年前豆b唔開胃, 對於一隻一向為食嘅狗狗, 有咁反常嘅轉變, 我梗係擔心; 即刻帶咗佢見醫生, 驗血照超聲波, 報告顯示早期腎衰竭係好大可能, 醫生本有意開一隻比腎病貓狗嘅益生菌, 作用係透過使用益生菌, 對腸道進行透析, 減慢尿毒素積聚, 保護腎臟免被進一步破壞.
問題最大係咁大粒嘅膠囊, 豆b根本唔可能吞, 又唔可以打開涔粉, 因為要保護膠囊內嘅益菌直達腸道, 免被胃酸破壞, 咁吞唔到只好作罷喇!
再後來睇過3個醫生, 反覆照X光超聲波, 都確定肝膽腎都差, 狗狗咁細身極難處理,好多檢查想做都無可能, 就叫寧養治療, 想食乜就食乜啦; 我都屬意保住佢唔辛苦, 當然希望可以搵到對佢有利嘅食物, 咁豆b就可以再陪伴我左右, 有幾長久就得幾長久喇!
我都明白豆b真係無可能好返, 但我唔想放棄就咁等時日, 除咗求教於順勢醫生, 仲不斷上網去搵, 睇吓仲有乜嘢方法可行, 最後用埋布緯療法!
 |
| Link: planet paws Kerfir 嘅好處 |
但我無忘記益生菌會幫助豆b好大, 又唔想加重佢肝腎負擔, 希望用食物替代合成嘅保健品; 皇天不負有心人, 誤打誤撞睇到呢隻食物 - Kefir!
即刻從美國訂購咗kefir starter, 用呢隻粉方便制作, 收到後即刻發酵; 因為唔知去邊搵到鮮羊奶, 我用咗鮮椰青水代替, 諗住下次搵到鮮羊奶再做過啦!
然後同幾位老友分享呢隻super yogurt, 有好嘢梗要惠及狗狗啦; 好彩我有同A講, 佢搵到資料話呢隻kefir包含0.5 ~ 2 %左右酒精成份, 比豆b食會唔會反而傷身?
Planet Paws完全無提及,可能咁低酒精成份對一般健康狗狗無影響, 所以著重描述佢嘅好處; 而我又太心急, 一見到益生菌比一般乳酪豐富, 就開心到暈, 今次太失魂, 資料搜集唔足夠 :(
祇要有1%危險, 我都唔敢博, 尤其豆b身體咁弱, 酒精又傷肝腎, 放棄喇...整好就益自己啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
